Lənkəranda oğlunu boğub öldürən ana barədə yeni faktlar

Lənkəranda törədilən dəhşətli qətlin bəzi təfərrüatları məlum olub. 

24 yaşlı ananın kirayə qaldığı evin sahibi Xalidə Əliyeva deyib ki, Sevinc Bayramova uşağını yastıqla boğaraq öldürdüyünü etiraf edib: “Dedi ki, yastıqla boğub, sərbəst yaşamaq istəyir. Daha yalan deyib, doğru deyib bilmirəm. İki aya yaxındır, burdadır. Mən belə şey görməmişəm”. 

Hadisə bu gün səhər saatlarında Lənkəran rayonunun Digah kəndində qeydə alınıb. Kənddə kirayədə yaşayan 24 yaşlı Sevinc Bayraməli qızı Bayramova iki yaşlı oğlu Məhəmmədi halsız vəziyyətdə Lənkəran Mərkəzi rayon Xəstəxanasının pediatriya şöbəsinə çatdırıb. Xəstəyə baxış keçirən həkimlər uşaqda həyat əlamətinin olmadığını aşkarlayaraq bu barədə rayonun hüquq-mühafizə orqanlarını məlumatlandırıblar. Ana uşağının qidadan boğularaq öldüyünü deyib. Amma istintaq tədbirləri nəticəsində uşağın boğulub öldürüldüyü müəyyənləşdirilib. İstintaqa verdiyi ifadəsində qadın övladını boğaraq öldürdüyünü etiraf edib. Sevinc Bayramova saxlanılıb.

Faktla bağlı Lənkəran rayon prokurorluğunda araşdırma aparılır. (APA TV)

Ölkə.Az