Xədicə İsmayılı tutduran şəxs özü də həbs edildi

İntihara cəhd etdiyini deyən Tural Mustafayev araşdırmaçı jurnalist Xədicə İsmayıla qarşı verdiyi şikayət ərizəsini geri götürür.

Ölkə.Az-ın qafqazinfo-ya istinadən məlumatına görə, bu barədə o, dekabrın 27-də öz facebook profilində məlumat yayıb: “Müstəqil vəkillərdən kömək istəyirəm. Xədicə İsmayıla qarşı verdiyim şikayət ərizəsin geri götürürəm. Kimsə təcili kömək eləsin. Həbs təhlükəsi var”.

Jurnalist Tural Mustafayev faktı Meydan Tv-yə də təsdiqləyib: “Xədicə İsmayıla qarşı verdiyim ərizəni geri çəkirəm və barışığa gedirəm. Müstəqil vəkil axtarıram. Ola bilsin ərizəmi geri götürəndən sonra özümü həbs etsinlər. Həbsim problem deyil. Sadəcə vaxt tapıb ərizəmi geri götürmək istəyirəm. Təcili kimsə mənimlə əlaqə saxlasın. Nümayəndəm var, Ruslan Əliyev, mən onunla danışdım, hazırda ərizəni geri götürmək üçün işləyir. Ancaq nümayəndə ilə olmur, vəkil lazımdır. Cavad Cavadlı, Elçin Sadıqov... O birilər Xədicənin vəkilləridir, onlar mənə vəkillik edə bilməyəcəklər. Anar Qasımlı və ya kimsə bunu boynuna götürə bilərsə, götürsün”.

Tural Mustafayev açıqlamasından təxminən 10 dəqiqə sonra təkrar Meydan TV ilə əlaqə saxlayaraq, polis tərəfindən saxlanıldığını deyib. O, bu barədə öz facebook səhifəsində də yazıb.