Dələduzluqda təqsirləndirilən redaktorun məhkəmə işi

“Ölkə.Az” xəbər verir ki, bu gün Bakı Ağır Cinayətlər Məhkəməsində hakim Eldar İsmayılovun sədrliyi ilə baş tutan prosesdə vəsatətlə çıxış edən Gündüz Hüseynov Aslan Ağayev və Emin Poladovun əlavə şahid qismində dindirilməsini istəyib. 

O, bildirib ki, zərərçəkmişlərdən aldığı pulları Aslan Ağayevə verib. Onun sözlərinə görə, Aslan Ağayev onu odlu silahla hədələyib, bu barədə heç kimə məlumat verməməsini tələb edib.

Məhkəmə vəsatətin Emin Poladovla bağlı olan hissəsini təmin etməyib. Hakim bildirib ki, vəsatətdə adı göstərilən şahid əvvəlki iclaslarda ifadə verib. 

Hakim Aslan Ağayevin əlavə şahid qismində dindirilməsi barədə vəsatəti baxılmamış saxlayıb. Hakim bildirib ki, həmin şahidlə bağlı məlumatlar vəsatətdə tam göstərilməyib. Hakim həmin şahidin anket məlumatlarının vəsatətdə tam göstərilməsini təqsirləndirilən şəxsə tövsiyyə edib. 

Növbəti proses aprelin 10-da davam edəcək.

İttihama görə, Gündüz Hüseynov öz işçilərinə qarşı dələduzluq edib. O, 200 min manatdan artıq pulu almaqda ittiham olunur.

Gündüz Hüseynov Cinayət Məcəlləsinin 178.3.2-ci (külli miqdarda dələduzluq törətmək), 32.4, 312.2-ci (iştirakçılıq, rüşvət vermə, vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət vermə və ya təkrar rüşvət vermə) maddələri ilə ittiham edilir.

“Zaman Press” qəzeti Mətbuat Şurasının reket qəzetlər siyahısına salınıb.