Sevgilisinin 450 min manatını ödəyən qadın azadlığa çıxdı
Bu gün Bakı Ağır Cinayətlər Məhkəməsində dələduzluqda təqsirləndirilən Türkay Əkbərli və Ceyran İsmayılzadənin cinayət işi üzrə məhkəmə prosesi başa çatıb.
“Ölkə.Az”ın məlumatına görə, hakim Mirzə Xankişiyevin sədrlik etdiyi iclasda hökm oxunub.
Hökmə əsasən, hər iki təqsirləndirilən şəxs barəsində 1 il sınaq müddəti seçilməklə şərti cəza seçilib. Onlar məhkəmə iclas zalından azadlığa buraxılıblar.
Məhkəmə hökmü elan edərkən, iş üzrə dəymiş ziyanın ödənilməsini nəzərə alıb.
Qeyd edək ki, onlar Cinayət Məcəlləsinin 178.3.2-ci (küllü miqdarda dələduzluq etmə) maddəsinə əsasən ittiham olunublar. İttihama görə, Türkay Əkbərli ilə zərərçəkən Bəhruz Nağıyev sevgili olub. Türkay Ceyran İsmayılova ilə əlbir olaraq, iş adamı Bəhruz Nağıyevin 450 min manat pulunu dələduzluq yolu ilə ələ keçirməkdə ittiham olunublar.
