İstefa verən aktyor direktoru məhkəməyə verir

Martın 5-də Azərbaycan Dövlət Musiqili Teatrından istefa verən solist-vokalist Elvin Əliyev bu gün məvacibini almaq üçün sözügedən mədəniyyət ocağına getsə də qapıdan içəri buraxılmayıb. 

Bu barədə E.Əliyevin özü məlumat verib. Aktyorun sözlərinə görə, o, baş verənlərlə bağlı nə teatrın direktoru Əliqismət Lalayevlə, nə də teatrın mühasibi ilə görüşə bilib: 

“Məni qapıda teatrın mühafizəçisi qarşıladı və dedi ki, Əliqismət Lalayevin teatra buraxılmamağımla bağlı göstərişi var: 

“Kimin onunla nə işi varsa, qapıda həll etsin. O, adam teatra girə bilməz”. 

Cavab verdim ki, işlədiyim müddətdə məvacibim hesablanıb mənə verilməlidir”. 

E.Əliyev əlavə edib ki, mühafizəçi onun yanında telefonla mühasibatlıqla əlaqə saxlayıb: 

“Oradan əvvəlcə dedilər ki, Elvin Əliyevin məvacibi hesablanmayıb. Soruşdum ki, nə vaxt hesablanacaq? Bundan sonra mühafizəçi yuxarı qalxdı və geri qayıdanda dedi ki, mühasibatlıqda bildirdilər ki, sən məvacibini almısan. Dedim ki, fevral ayında kartımın vaxtı bitdiyindən onu təhvil vermişəm. Belə olan halda məvacibi nə vaxt və haradan almışam? Heç yerə də imza çəkməmişəm”. 

Aktyor vurğulayıb ki, əgər teatr rəhbərliyi onun məvacibini sülh yolu ilə verməsə, o zaman əmək müfəttişliyinə və məhkəməyə şikayət edəcək. Xatırladaq ki, E.Əliyev teatrdan mart ayında istefa verib. (aznews.az)

Ölkə.Az