Ağdaşda atası tərəfindən zorlanan qız hardadır?

"Cəfərov İlqar Rasim oğlunu yaxşı tanıyırdım, xeyirə-şərə yarayan adam idi. İki oğlu var, biri hərbi xidmətdən ötən ay qayıdıb. Normal, tərbiyəli ailədirlər. Digər ailəni də pis tanımamışam. Amma zorlandığı deyilən qızı ümumiyyətlə, tanımıram. Çünki uşaqdır. Bəlkə də görsəm, üzdən tanıyaram".

Bunu Ölkə.Az-a açıqlamasında Ağdaş rayonu Qulbəndə kənd icra nümayəndəsi Səbuhi Məmmədov bir neçə gün öncə baş vermiş dəhşətli hadisə barədə danışarkən bildirib. S.Məmmədovun sözlərinə görə, hazırda zorlandığı deyilən 1994-cü il təvəllüdlü C. S və anası Qulbəndə kəndini tərk ediblər:

"Hadisə baş verən gündən onlar kənddən çıxıblar. Digər ailədə isə üç mərasimidir. Allah heç kəsə göstərməsin. Nəsə mən zorlama söhbətinə inanmıram. Çünki bu ailəni də pis tanımamışam".

Xatırladaq ki, sözügedən xəbəri APA yaymışdı. Bildirilirdi ki, Ağdaşın Qulbəndə kənd sakini, 1968-ci il təvəllüdlü Cəfərov İlqar Rasim oğlu özünü həyətdəki tövlədə asaraq intihar edib.

İki uşaq atası İ. Cəfərovun özünə qəsd etməsinin səbəbinin isə qardaşı, 1967-ci il təvəllüdlü Cəfərov Asim Rasim oğlunun öz qızını zorlaması barədə qızın anasının polisə şikayət ərizəsi yazması olub.

Məlumata görə, kənd sakini 1974-cü il təvəllüdlü Cəfərova Mətanət Əbülhəsən qızı Ağdaş Rayon Polis Şöbəsinə ərizə ilə müraciət edərək bildirib ki, həyat yoldaşı Asim Cəfərov evdə öz qızı, 1994-cü il təvəllüdlü C. S.-nı zorlayıb.

Ana qızının hamilə qalmasını görəndən sonra məsələdən xəbər tutub, şikayət etmək qərarına gəldiyini bildirib.

Qonşuların bildirdiyinə görə, C.S. bir neçə il öncə başqa bir oğlanla qeyri-rəsmi şəkildə ailəli olub və 3 ay onunla birgə yaşadıqdan sonra boşanaraq atasının evinə gəlib.

Ana bu günlərdə qızının hamilə qaldığını öyrənib. O, izahatında qızının atası tərəfindən zorlandığını bildirib və 3 uşağını da götürərək Ağdaş şəhərinə - atasının evinə gedib.

Qonşuların sözlərinə görə, C.S. da atası tərəfindən zorlandıqdan sonra hamilə qaldığını bildirib. Polis əməkdaşları Asim Cəfərovu şübhəli şəxs qismində saxlayıblar.

A. Cəfərovun bu hadisəni eşidən qardaşı İ. Cəfərovun isə özünü asdığı bildirilir.

Hər iki faktla bağlı Ağdaş Rayon Polis Şöbəsi və Prokurorluğu tərəfindən araşdırma aparılır.

İntiqam VALEHOĞLU
Ölkə.Az