"Bank Technique”nin sədri “Bandotdel”dən buraxıldı
“Bank Technique” Müşahidə Şurasının mayın 22-də saxlanan sədri Rövşən İsmayılov bu gün sərbəst buraxılıb. O, DİN Mütəşəkkil Cinayətkarlığa Qarşı Mübarizə İdarəsinin binasını artıq tərk edib.
Bu məlumat hüquq-mühafizə orqanlarındakı mənbələr tərəfindən verilib. R.İsmayılov pul yumaqda ittiham olunur.
Qeyd edək ki, “Bank Technique” Müşahidə Şurasının sədri Rövşən İsmayılov saxlanılması barədə məlumat yayılmışdı. Məlumata görə, Rövşən İsmayılov ötən həftənin cümə günü - mayın 22-də saxlanılıb.
Rövşən İsmayılov “Bank Technique”dən əvvəl Azərbaycan Beynəlxalq Bankında işləyib, İdarə Heyəti sədrinin müavini postunu tutub. 2012-ci ildə isə “Bank Technique” Müşahidə Şurasının sədri təyin olunub.
Xatırladaq ki, mayın 22-də “Bank Technique”nin Xəzər filialının direktoru Fərid Məmmədov da saxlanılmışdı. Fərid Məmmədov vurulmuş məmurlar siyahısına düşən Prezident yanında Strateji Araşdırmalar Mərkəzinin rəhbəri Fərhad Məmmədovun qardaşıdır.
Fərid Məmmədov saxlanılarkən onun kabinetindən 4 milyon dollar nağd pul aşkarlanaraq götürülüb. Lakin filial direktoru bir sutkadan sonra sərbəst buraxılıb. (virtualaz.org)
Ölkə.Az
