Kəmaləddin Heydərov Sabunçuda yanğın baş verən əraziyə gəlib

Sabunçu rayonu Qanbay Vəzirov küçəsində 500 kv.m sahədə baş vermiş yanğınla əlaqədar olaraq Fövqəladə Hallar Naziri Kəmaləddin Heydərov və nazirliyin vəzifəli şəxsləri hadisə yerinə gəliblər.

Ölkə.az-ın əldə etdiyi məlumata görə, hadisə yerinə baxış zamanı nazir ərazidə yerləşən yeni tikililərin təhlükəsizlik tələblərinə cavab vermədiyini bildirərək, sökülməsi barədə göstəriş verib.

Nazirin göstərişinə əsasən, sökülməsi nəzərdə tutulan evlərdə yaşayan ailələrə konpensasiya veriləcək. Bundan başqa, dəmir yolu vağzalı ilə Sabunçu qəsəbəsini birləşdirəcək yeni yolun çəkilməsi də təmin ediləcək.

Xatırladaq ki, Fövqəladə Hallar Nazirliyinin rəsmi saytının yaydığı məlumata görə, Bakı şəhəri, Sabunçu rayonunda 500 kv.m sahədə mazut qarışıqlı məişət tullantıları yanıb. Məlumatda bildirilir ki, yaxınlıqdakı tikililər və mazut gölməçəsi yanğından mühafizə olunub. Yanğın saat 09:07-də yanğınsöndürənlər tərəfindən söndürüb.

Ölkə.az