Bakı-Quba yolunda qəza: 6 ölü

Daxili İşlər Nazirliyi Bakı-Quba yolunda baş verən dəhşətli yol qəzası ilə bağlı məlumat yayıb.

Ölkə.Az-ın Daxili İşlər Nazirliyinin saytına istinadən verdiyi məlumata görə, avqustun 1-də saat 04 radələrində Sumqayıt şəhərinin Hacı Zeynalabdin Tağıyev qəsəbəsində Bakı şəhər sakini Əli Əliyev idarə etdiyi “Opel” markalı avtomobili yolun kənarında dayanan, Bakı şəhər sakini Ərşad İbayevə məxsus “Mercedes” markalı yük avtomobilinin qoşqusuna vurub.

Nəticədə Ə.Əliyev və sərnişinlərindən atası Xanlar, qardaşı Məhəmməd, həmyerliləri Sabir Əliyev, Tural Rzayev hadisə yerində, Rəvan Əliyev isə xəstəxanada ölüblər.

Faktla bağlı Baş Dövlət Yolis Polisi İdarəsi tərəfindən araşdırma aparılır.

01.08.2015

Bakı-Quba yolunda 5 nəfərin ölümü ilə nəticələnən yol-nəqliyyat hadisəsi baş verib.

Fövqəladə Hallar Nazirliyindən verilən məlumata görə, Bakı-Quba yolunun 45-ci kilometrliyində “Opel” markalı minik avtomobili yolun kənarında hərəkətsiz dayanan “Mercedes” markalı yük avtomobilinə çırpılıb.

Qəza nəticəsində deformasiyaya uğramış “Opel” markalı minik avtomobilinin 5 sərnişini aldığı müxtəlif bədən xəsarətləri nəticəsində hadisə yerində vəfat edib.

Dərhal Fövqəladə Hallar Nazirliyinin xilasetmə qüvvələri 5 nəfərin cəsədini avtomobildən çıxararaq aidiyyəti üzrə təhvil veriblər.

Əməliyyat saat 05:05-də başa çatıb.

Faktla bağlı araşdırma aparılır.

Ölkə.Az