Jurnalist Rasim Əliyev “Qəbələ”nin futbolçusunu tənqid etdiyi üçün döyülüb

Şənbə günü jurnalist Rasim Əliyevə hücum edilib və o, qəddarcasına döyülüb. Onun qabırğaları qırılıb və sol qulağı eşitmir. Jurnalistin döyülməsinə səbəb kimi onun futbolçu Cavid Hüseynovun hərəkətini "facebook" səhifəsində tənqid etməsi göstərilir.

Ölkə.Az xəbər verir ki, bu barədə Əliyev özü Turan-a bildirib. O, qaynar-info saytına məlumat və video göndərib. Orda bildirilir ki, avqustun 6-da «Qəbələ» ilə «Apollon» («Qəbələ» 1:0 hesabı ilə udub və Avropa Liqasının pley-off mərhələsinə çıxıb) komandası arasında görüşdən sonra kiprli jurnalistin oyundan sonra niyə Türkiyə bayrağı qaldırması ilə bağlı sualına cavab olaraq futbolçu deyib ki, «türklər dostumuzdur» və jurnalistə pis jest göstərib.

Əliyev bunu şərh edərkən yazıb ki, «belə tərbiyəsiz və özünü apara bilməyən futbolçunun» ölkəni Avropada təmsil etməsini istəməzdi.

Əliyevin sözlərinə görə, status yazılandan sonra səhifəsinə təhqiredici şərhlər yazılıb. Şənbə günü özünü Hüseynovun bibisi oğlu kimi təqdim edən bir nəfər onu təhqir edib və hədələyib.

«Sonra Cavid Hüseynov özü zəng etdi. Normal söhbətimiz oldu. Dedi ki, onun jestini düzgün anlamayıblar. O, Azərbaycanla Türkiyənin dost ölkələr olduğunu demək istəyirdi. Bu barədə də facebook səhifəmdə yazdım. Sonra özünü Hüseynovun bibisi oğlu kimi təqdim edən şəxs yenə zəng etdi və o da normal tonda danışdı və barışıq üçün çay içməyə dəvət etdi. Dedim ki, ehtiyac yoxdur, israr etdi. Dedim ki, Bayıldayam və onlar gəldilər. Mən tək idim, onlar isə 5-6 nəfər idi. Dərhal hücum edib döyməyə başladılar. Mobil telefonum düşdü və onu götürüb qaçdılar. “Təcili yardım”a müraciət etdim və məni 1 saylı Şəhər Kliniki Xəstəxanasına yerləşdirdilər. Hazırda burdayam», - deyə Əliyev Turan müxbirinə bildirib.

Jurnalistin sözlərinə görə, qabırğaları sınıb və sol qulağı eşitmir. Jurnalist DİN-ə şikayət etmək niyyətindədir.

Rasim Əliyev ölkənin ictimai-siyasi həyatı ilə bağlı foto və videoreportajları ilə məşhurdur. «Qəbələ» FK Gilan Holding-ə bağlıdır. Klubun prezidenti Tale Heydərov FHN rəhbəri Kəmalədddin Heydərovun oğludur.

Ölkə.Az