Qızla intim əlaqədə olmaq adı ilə quldurluq edən şəxsin cəzası azaldıldı
Əkbər Gülverdiyevi söyüş söydüyünə görə vurduğunu və onu qarət etmədiyini bildirib.
Bakı Apellyasiya Məhkəməsində Arzuman Həsənalıyevin CM-nin 181.2.5-ci (quldurluq, silah və ya silah qismində istifadə edilən əşyalar tətbiq edilməklə törədildikdə) maddəsi ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.
Ötən il aprelin 19-da “28 may” metrosu yaxınlığındakı barlardan birinin qarşısında dayanan Masallı rayon sakini Əkbər Gülverdiyevi görən Arzuman Həsənalıyev, onu aldadaraq Dəmiryol vağzalındakı vaqonların saxlanma parkına gətirib və orada zərərçəkəni daşla baş nahiyəsindən vuraraq, ona məxsus 200 manat pulu açıq yolla talayaraq, hadisə yerindən qaçıb. Bununla əlaqədar zərərçəkən Nəsimi RPİ 22-ci polis bölməsinə müraciət edib və iki gündən sonra Həsənalıyev şübhəli şəxs qismində tutularaq, istintaqa cəlb olunub.
Məhkəmə prosesində Arzuman Həsənalıyev özünü ittiham üzrə təqsirli bilməyərək, Əkbər Gülverdiyevi söyüş söydüyünə görə vurduğunu və onu qarət etmədiyini bildirib. Lakin zərərçəkənin ifadəsi tam fərqli olub. Əkbər Gülverdiyevin sözlərinə görə, o, Masallı rayonundan Bakıya gələrək, tikintidə fəhlə işləyib. Həmin axşam o, barın yanında dayanan 3 qıza yaxınlaşaraq tanış olmaq istəyib, lakin onlar onunla tanış olmayaraq, içəri daxil olublar.
Bir-iki dəqiqədən sonra Arzuman adlı oğlan ona yaxınlaşaraq, nə baş verdiyini soruşub, o isə qızla tanış olmaq istədiyini deyib. Cavab olaraq Həsənalıyev ona köməklik edəcəyini söz verib və bundan sonra onlar C.Hacıbəyli küçəsində yerləşən “Qarabağ” otelinin yanında yerləşən çayxanaya gəliblər. Çay içərkən Arzuman qızla intim əlaqədə olması üçün 50 manat lazım olduğunu deyib, Gülverdiyev tikintidə işlədiyini və hazırda üstündə 200 manat olduğunu bildirib.
Hətta həmin pulu cibindən çıxardaraq, ona göstərib. Daha sonra Arzuman onu masaj salonunun qabağına gətirib və əvvəlcədən ondan pul istəyib, amma Əkbər pulu qızla cinsi əlaqədə olandan sonra verəcəyini deyib. Görünür bundan sonra, Həsənalıyev pul ala bilmədiyini görüb, onu hadisə baş verən əraziyə gətirib və daşla vuraraq, 200 manat pulunu alıb qaçıb.
Bakı Ağır Cinayətlər Məhkəməsinin hökmü ilə Arzuman Həsənalıyev 10 il müddətinə azadlıqdan məhrumetmə cəzasına məhkum olunub. Hökmdən məhkumun müdafiəçisi və zərərçəkən şəxs apellyasiya şikayətləri veriblər.
Bakı Apellyasiya Məhkəməsi işi araşdıraraq təqsirləndirilən şəxsin əməlini CM-nin 181.2.5-ci maddəsindən 127.1-ci (zərərçəkmiş şəxsin həyatı üçün təhlükəli nəticələrə səbəb olmayan qəsdən sağlamlığa az ağır zərər vurma) maddəsinə tövsif edib və A.Həsənalıyevə 2 il müddətinə azadlıqdan məhrumetmə cəzası təyin edilib. (oxu.az)
Ölkə.Az
