\"Baku Bus\"la avtomobil necə toqquşub? - AÇIQLAMA ( YENİLƏNİB)
Bakının Nəsimi rayonunda 5 saylı sərnişin avtobusu qəzaya uğrayıb.
Hadisə ilə bağlı Bakı Nəqliyyat Agentliyindən (BNA) Ölkə.az-a daxil olan məlumata görə, hadisə 5 nömrəli avtobus işıqforda dayanan zaman qeydə alınıb.
"24.01.2023 tarixində saat 17:40 radələrində Puşkin küçəsində "Baku Bus" MMC-nin müvəqqəti istismarında olan 5 nömrəli müntəzəm marşrutda 99-JS-113 (67129) dövlət qeydiyyat nişanlı avtobusu idarə edən sürücü Məmmədov Emil minik avtomobili ilə yüngül qəza edib. Hadisə zamanı minik avtomobili işıqforda dayanan avtobusun arxa hissəsinə yüngül toxunub.
Daxili İşlər Nazirliyinin (DİN) 102 xidməti və Təcili Təxirəsalınmaz Tibbi Yardıma (TTTY) məlumat verilməyib. Belə ki, qəza nəticəsində xəsarət alan olmayıb. Qarşı tərəf hadisə yerindən yayınıb".
***
Bakının Nəsimi rayonunda 5 saylı sərnişin avtobusu qəzaya uğrayıb, xəsarət alan var.
Ölkə.az unikal-a istinadən xəbər verir ki, avtobus hərəkətdə olarkən digər avtomobillə toqquşub. Hadisə zamanı sərnişin, 1988-ci il təvəllüdlü Dadaşov Rəşad Ədalət oğlu xəsarət alıb.
Yaralı təcili tibbi yardımın köməkliyi ilə xəstəxanaya çatdırılıb. Müayinə zamanı ona sol bazu sümüyünün yerdəyişən sınığı diaqnozu qoyulub.
Fakt araşdırılır.
