"Bayraq çağırışı" baş tutmadı

Stadiona Türkiyə bayraqlarının kütləvi şəkildə girişi baş tutmayıb

Ölkə.Az xəbər verir ki, Avropa Liqasının play-off mərhələsi çərçivəsində hal-hazırda davam edən "Qəbələ" və "Panatinaikos" matçına azarkeşlərin Türkiyə bayrağı ilə girişinə icazə verilməyib.

Xatırladaq ki, bir neçə gün öncə oyunda ajiotaj yaradaraq, yunanları qıcıqlandırmaq məqsədilə sosial şəbəkələrdə bir qrup şəxs hamını oyuna Türkiyə bayraqları ilə gəlməyə çağırmışdı.

Ölkə.Az dəfələrlə bu məsələyə toxunaraq azarkeşləri bu cür provakasiyalara qoşulmamağa səsləmişdi.

Onu da qeyd edək ki, 2009-cu ilin noyabr ayında Bursa şəhərində baş Türkiyə-Ermənistan futbol matçı zamanı stadiona Azərbaycan bayraqları ilə girmək istəyən azarkeşlərin bayraqları alınmış, hətta bəzi türk polis işçilərinin Azərbaycan bayrağına qarşı hörmətsiz davranaraq zibil qutusuna atması iki ölkə ictimaiyyətində də birmənalı qarşılanmamış, Azərbaycan vətəndaşlarının qınaq hədəfi olmuşdu.

Bu kimi xoşagəlməz halların yaşanmaması üçün FIFA rəsmiləri iki ölkə, yaxud iki ölkə klublarının oyunu zamanı üçüncü ölkənin bayraqlarının kütləvi şəkildə stadiona gətirilməsinin provakasiya ola biləcəyini vurğulayaraq buna yol verməməyi tövsiyyə edir.

Hazırda keçirilən "Qəbələ"-"Panatinaikos" matçından öncə sosial şəbəkələrdə bir qrup insanın "bayraq çağırışı" Azərbaycanın öndə gələn insanları tərəfindən də yolverilməz olduğu qeyd edilmiş və günlər öncə aidiyyatı qurumlara xəbərdarlıq edilmişdi.

Türkiyə-Yunanıstan arasında uzun illər davam etmiş soyuq münasibəti nəzərə alaraq Azərbaycanda ölkə klubunun yunan klubu ilə oyununda bayraq krizisinin çıxmasının öncədən qarşısını almaq alqışlanacaq addımdır və müvafiq qurumlara xüsusi təşəkkür etməyə dəyər.

"Qəbələ"mizə uğurlar diləyirik!

Ölkə.Az