Cəlilabadda yanan evdən xilas edilən azyaşlının vəziyyəti açıqlandı - YENİLƏNİB

Cəlilabadda yanğın zamanı tüstüdən zəhərlənən beş yaşlı R.İ-nin vəziyyəti ağır olaraq qalır.

Bu barədə APA-nın cənub bürosuna Cəlilabad Rayon Mərkəzi Xəstəxanasının Təcili Yardım Şöbəsinin həkimi Arzu Cəfərli məlumat verib.

Bildirilib ki, 8 sentyabr 2024-cü il, saat 14:20-də 2019-cu il təvəllüdlü azyaşlı qız tüstüdən zəhərlənmə diaqnozu ilə Cəlilabad Rayon Mərkəzi Xəstəxanasının Təcili Yardım Şöbəsinə daxil olub:

"Təxirəsalınmaz qaydada xəstə reanimasiya şöbəsinə yerləşdirilib və intensiv reanimasion yardım tədbirləri icra olunub. Hazırda xəstənin vəziyyəti ağır olaraq qalır. Müalicə və müşahidə davam edir".

***

Cəlilabad rayonunun Azərbaycan küçəsində yerləşən iki mərtəbəli yaşayış evində baş verən yanğın söndürülüb.

"Ölkə.az" "Report"a istinadla xəbər verir ki, hadisə zamanı evdə təxminən 6-7 yaşlarında iki azyaşlı uşaq olub. Uşaqlardan biri hadisə zamanı çölə qaçaraq xilas olub. Digər uşaq isə yatmış vəziyyətdə olduğundan içəridə qalıb. Hadisə yerinə gələn Fövqəladə Hallar Nazirliyinın Cənub Regional Mərkəzi Dövlət Yanğından Mühafizə Xidmətinin Cəlilabad rayon Yanğından Mühafizə Hissəsinin yanğınsöndürənləri uşağı xilas ediblər.

Azyaşlı ağır vəziyyətdə Cəlilabad Rayon Mərkəzi Xəstəxanasına aparılıb.

Hadisə nəticəsində təxminən 300 kv.m sahəyə malik ikimərtəbəli evin 80 kv.m-i qorunsa da, içəridə olan bütün əşyalar və yanar konstruksiyalar yanıb.

Faktla bağlı araşdırma aparılır.

***

Cəlilabad rayonunda evdə yanğın başlayıb.

"Ölkə.az" "Report"a istinadla xəbər verir ki, hadisə Azərbaycan küçəsində yerləşən yaşayış evlərindən birində qeydə alınıb.

Məlumata görə, yanğın zamanı iki azyaşlı uşaq evdə qalıb.

Hazırda onların xilas olunması üçün Fövqəladə Hallar Nazirliyinin Cənub Regional Mərkəzi Dövlət Yanğından Mühafizə Xidmətinin Cəlilabad rayon Yanğından Mühafizə Hissəsinin yanğınsöndürənləri hadisə yerinə cəlb olunub.