Azyaşlını ilan sancması xəbərinə Nəbatat Bağından REAKSİYA - Yenilənib
Bu barədə Ölkə.Az-a bağın Mətbuat Xidmətindən məlumat verilib.
Qeyd olunub ki, bağın ərazisinə təcili tibbi yardım avtomobili daxil olmayıb, yayılan xəbər araşdırılır.
Həmçinin bildirilib ki, bağın ərazisi mütəmadi olaraq dərmanlanır.
Xatırladaq ki, mediada bağın ərazisində yeddi yaşlı uşağı ilan sancdığı barədə məlumatlar dərc olunub.
***
Mərkəzi Nəbatat Bağında ilan sancan azyaşlının vəziyyəti açıqlanıb.
TƏBİB-dən Ölkə.Az-ın sorğusuna cavab olaraq bildirilib ki, ötən gün ilan sancması səbəbi ilə 2018-ci il təvəllüdlü azyaşlı (kişi cinsli) Kliniki Tibbi Mərkəzin Toksikologiya şöbəsinə hospitalizasiya olunub.
Dərhal zəruri tibbi xidmətlər göstərilən azyaşlıya ilan zəhəri əleyhinə zərdab tətbiq olunub.
Hazırda azyaşlının müalicəsi Toksikologiya şöbəsində davam etdirilir, vəziyyəti ağır qiymətləndirilir.
***
12:08
Ötən gün Badamdar şossesində yerləşən Mərkəzi Nəbatat Bağında azyaşlını əqrəb və ya ilan sancdığı bildirilir.
Ölkə.Az xəbər verir ki, bu barədə zərəçəkən azyaşlının ailəsinə yaxın şəxslər sosial şəbəkələrdə məlumat paylaşıb.
Məlumata görə, xəstəxanaya çatdırılan 6 yaşlı uşağa həkimlər müdaxilə edib. Hazırda azyaşlının müalicəsi davam etdirilir. Onun vəziyyəti orta ağır kimi qiymətləndirilir.
Məsələ ilə bağlı Mərkəzi Nəbatat Bağının tabe olduğu Bakı Şəhər İcra Hakimiyyəti ilə əlaqə saxlamağa çalışsaq da, cəhdlərimiz baş tutmadı.
Billurə
