Salyanda zəhərlənmə şübhəsi ilə xəstəxanaya müraciət edən şagirdlər evə buraxılıblar - AÇIQLAMA - YENİLƏNİB

"Salyan rayon Aşağı Noxudlu kənd tam orta məktəbində tüstüdən zəhərlənmə şübhəsi ilə xəstəxanaya müraciət edən şagirdlərin hər biri artıq evə buraxılıb, vəziyyətləri stabildir".

Ölkə.az xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin (MÜTDA) İctimaiyyətlə Əlaqələr Sektorunun müdiri Zenfira Sevdimalı öz sosial şəbəkə hesabında məlumat yayıb.

Qeyd olunub ki, məktəbdə baş verən hadisə MÜTDA və Şirvan-Salyan Regional Təhsil İdarəsi tərəfindən nəzarətə götürülüb.

***

Salyanda məktəbdə tüstüdən zəhərlənənlərin sayı 20 nəfərə çatıb.

Ölkə.az xəbər verir ki, zəhərlənmə diaqnozu ilə daha iki nəfər xəstəxanaya gətirilib.

***

Salyan Rayon Mərkəzi Xəstəxanasının Təcili tibbi yardım şöbəsinə 05.12.2025-ci il tarixində saat 13:40 radələrində 17 nəfər (13 nəfər qadın cinsi, 4 nəfər kişi cinsi olmaqla) tüstüdən zəhərlənmə şübhəsi ilə hospitalizasiya olunub.

Ölkə.Az xəbər verir ki, bu barədə TƏBİB-dən məlumat verilib.

Pasiyentlərin hər birinə zəruri tibbi xidmətlər göstərilib. Onlardan vəziyyəti stabil qiymətləndirilən 9 nəfər ambulator müalicə üçün evə buraxılıb.

Hazırda 8 nəfərin müalicəsi davam etdirilir, vəziyyətləri stabildir.

***

Salyanda məktəbdə şagirdlər tüstüdən kütləvi zəhərləniblər.

Ölkə.az-ın APA-ya istinadən məlumatına görə, hadisə Salyan rayonunun Noxudlu kənd orta məktəbində baş verib.

İlkin məlumata görə, 11 şagird, 2 əməkdaş məktəbi qızdırmaq üçün istifadə olunan yanacağın tüstüsündən zəhərlənərək xəstəxanaya yerləşdirildiyi bildirilir.

Faktla bağlı araşdırma aparılır.