Taksi sürücüsü müştərinin kartından 1297 manat oğurlayıb

Bakıda taksi sürücüsü sərnişinin bank kartından ümumilikdə 1297 manat vəsaiti ələ keçirdiyinə görə məhkum edilib.

Ölkə.az xəbər verir ki, hadisə taksi fəaliyyəti ilə məşğul olan şəxsin Əhmədli metro stansiyası yaxınlığından götürdüyü sərnişini Qala qəsəbəsinə aparması zamanı baş verib. Sərnişin yol haqqını onlayn qaydada ödəmək istəyərkən bank kartı məlumatlarını və təhlükəsizlik kodunu sürücü ilə bölüşüb.

Sürücü həmin məlumatlardan istifadə edilərək sərnişinin bank kartından müxtəlif əməliyyatlarla ümumilikdə 1297 manat özünün "M10” hesabına köçürüb.

Təqsirləndirilən şəxs məhkəmədə əməlini etiraf edib və götürdüyü vəsaiti şəxsi xərclərinə sərf etdiyini bildirib. O, həmçinin dəymiş ziyanın tam ödənildiyini qeyd edib.

Məhkəmənin hökmünə əsasən, müttəhim Cinayət Məcəlləsinin 177.2.3-1-ci maddəsi ilə təqsirli bilinərək 2 il müddətinə azadlığın məhdudlaşdırılması cəzasına məhkum edilib. Onun şübhəli şəxs qismində saxlanıldığı müddət cəzadan çıxılıb və üzərində qəti olaraq 1 il 11 ay 28 gün müddətinə azadlığın məhdudlaşdırılması cəzası saxlanılıb.(qaynarinfo)