Məhkəmə anasını öldürən oğulla bağlı qərar verdi: "yazışmalar çıxarılsın"
Bu gün Bakı Ağır Cinayətlər Məhkəməsində hakim Namiq Kərimovun sədrliyi ilə anasını qətlə yetirməkdə təqsirləndirilən Emil Ağayevin cinayət işi üzrə məhkəmə iclası keçirilib.
Ölkə.az xəbər verir ki, məhkəmə zərərçəkənin hüquqi varisi S.A-ya verilən suallarla davam edib.
O, qardaşı Emil Ağayevi yalan danışmaqda ittiham edib:
"Qardaşım kişi kimi sözün düzünü desin. Mən düşünürəm ki, onun çoxlu borcu var, anamı da buna görə öldürüb. Düşünüb ki, həm pullara yiyələnəcək, həm də həbsdə olmaqla borc yiyələrindən qaçacaq. Anamın kiminləsə münasibətinin olması ağ yalandır. O gözəl geyinməyi, bəzənməyi sevirdi, bu o demək deyil ki, həyatında kimsə var idi. Qardaşım da olsa, cəzasını çəkməlidir. Utanmaz, vicdansız. Necə əlin gəldi qıydın anama? O bütün ömrünü sənə həsr eləmişdi".
Təqsirləndirilən E.Ağayev vəsatətlə məhkəməyə müraciət edərək anasının telefon zənglərinin və sosial şəbəkə hesablarının çıxarılmasını məhkəmədən istəyib:
"Telefon gecə-gündüz anamın əlindən düşmürdü, ola bilməz ki, onun kiminləsə münasibəti olmasın".
Məhkəmə tərkibi qısa müşavirədən sonra vəsatətin qismən təmin olunduğunu - öldürülən Həyat Ağayevanın telefonundan 15 - 24 yanvar tarixindəki yazışmaların çıxarılmasını təmin edib.
Sosial şəbəkə hesablarından çıxarışla bağlı vəsatət təmin edilməyib.
Növbəti proses 12 avqust saat 10:00-a təyin olunub.
İttihama görə, E.Ağayev anasının kişilərlə əlaqə saxladığına görə öldürüb. Belə ki, E.Ağayev qaynatasının evə gələcəyi barədə yalan deyərək anasını evə çağırıb. Anası işdən evə gəldikdə isə onu boğaraq üz nahiyyəsindən yumruqlar vurmuş, daha sonra öldüyündən əmin olmaq üçün 2 dəfə bıçaqla boğazından zərbə endirərək, xüsusi amansızlıqla öldürüb.
Xatırladaq ki, qətl hadisəsi ötən ilin yanvar ayının 24-də paytaxtın Sabunçu rayonu, Maştağa qəsəbəsində baş verib. 1981-ci il təvəllüdlü Emil Ağayev anası 1959-cu il təvəllüdlü Həyat Ağayevanı amansızlıqla qətlə yetirib.
O, hadisə baş verən gün həyat yoldaşı ilə birlikdə qayınanasıgildə qalıb. Səhər saatlarında isə evə gəlib və anasının iş yerinə taksi göndərərək qayıtmasını xahiş edib. Həyat Ağayeva evə gəldikdə isə onu bıçaqlayaraq həyatına son qoyub.Faktla bağlı cinayət işi başlanılıb, Emil Ağayev Cinayət Məcəlləsinin 120.2.2, 120.2.4, 120.2.9 maddələri ilə məsuliyyətə cəlb edilib.(lent.az)
