İllərlə zorakılıq görən qadın uşaqları ilə birlikdə sığınacağa yerləşdirildi - VİDEO
“Mehriban Qadın Uşaq Sığınacağı” 14 il ərzində fiziki və psixoloji zorakılığa məruz qaldığını bildirən qadının uşaqları ilə birlikdə sığınacağa qəbul edildiyini açıqlayıb.
Ölkə.az xəbər verir ki, sığınacağın yaydığı məlumata görə, qadının vəziyyəti ürəkaçan deyil və məsələ ilə bağlı aidiyyəti qurumlara artıq məlumat verilib.
Qadının sözlərinə görə, o, uzun illər ərzində davamlı olaraq zorakılığa məruz qalıb. Bildirib ki, uşaqların səs salması, ən xırda məişət məsələləri və ya qarşı tərəfin əsəbiləşməsinə səbəb olan kiçik hallar belə ona qarşı fiziki və psixoloji təzyiqlərlə nəticələnib.
Məlumata əsasən, qadın uzun müddət davam edən ağır şəraitdən sonra övladları ilə birlikdə həmin mühitdən uzaqlaşaraq sığınacağa yerləşdirilib.
Hazırda qadına və uşaqlarına təhlükəsiz yaşayış şəraiti yaradılıb, onlara psixoloji və hüquqi dəstək göstərilir.
Həmidə İbrahimova
