“Var-yoxumu söyməsinə görə ona iradımı bildirdim”

Prosesə hakim Azər Orucov sədrlik edir.

İstintaqla müəyyən edilib ki, mənzil təmiri ilə məşğul olan Ş.Gülmətov bu il aprel ayının 23-də usta yoldaşı, 1962-ci il təvəllüdlü İmamverdi Kərimovla aralarında yaranmış mübahisə nəticəsində ona bıçaqla çoxsaylı xəsarətlər yetirib.

Ağır vəziyyətdə xəstəxanaya çatdırılan yaralı dərhal əməliyyat olunub. 14 bıçaq zərbəsi almasına baxmayaraq həkimlər yaralını xilas edə biliblər.

Təqsirləndirilən şəxs qismində dindirilən Ş.Gülmətov ifadəsində İmamverdinin onu oğurluqda ittiham etdiyimi deyib: “Üç il olar ailə qurmuşam. Himayəmdə iki azyaşlı övladım var. Fərdi və müxtəlif tikililərdə ustalıq edirdim. İmamverdini usta yoldaşım İqorun vasitəsilə tanımışam. İqor onu “İmam” deyə çağırırdı. Kafel ustası olan İmamverdinin əvvəllər məhkum olunmasını mənə İqor demişdi.

Hadisədən bir gün əvvəl mənzildə malyar işləri gördüyüm zaman İqor divarın künclərində əyriliklər olmasını irad tutdu. Bununla bağlı aramızda mübahisə düşdü. Amma dalaşmadıq. İqora dedim ki, işimi bəyənmirsənsə, başqa usta tap. Həmin vaxt İmamverdi eyvanda işləyirdi. O, bizim söhbətə müdaxilə etməyib kənarda sakitcə dayanıb qulaq asırdı. Mən paltarlarımı götürüb mənzildən çıxdım.

Ertəsi gün İmamverdi mobil telefonuma zəng vuraraq “işdə olanda 20 manatımı cibimdən oğurlamısan” dedi. Ona “sənin 20 manatına qalmamışam” desəm də xeyri olmadı. İmamverdi mənimlə kobud danışaraq ünvanıma ağır söyüş söydü. “Mənzildə üç nəfər olmuşuq, kənar adam olmayıb, mütləq sən götürmüsən” deyə israr etdi.

İmamverdi ünvanıma söyüş söyərkən telefonda İqorun gülüş səsləri gəldiyini eşitdim. İmamverdidən harada olduqlarını xəbər aldıqda təmir olunan mənzildə olduqlarını dedi. Bir saata həmin mənzildə olacağımı söylədim”.

Təqsirləndirilən şəxsin ifadəsinə görə, o, İmamverdini cəzalandırmaq üçün evdən çıxarkən özü ilə bıçaq götürməyi unutmayıb: “Telefonda var-yox söyüşü etdiyindən özümlə bıçaq götürüb gödəkcəmin cibinə qoydum ki, onun söyüşlərinin cavabını verim, ondan qisasımı alım. Bu günə kimi heç kəs mənim ailəmi söyüb təhqir etməmişdi. İmamverdinin söyüşləri mənə çox pis təsir etmişdi.

Təmir olunan mənzilə gəlsəm də qapının bağlı olduğunu görüb İqora zəng vurdum. İqor mənzilin yaxınlığındakı “Faxralı” kafesində olduqlarını, ora gəlməyimi söylədi. Kafeyə gəldikdə İqorla İmamverdinin masa arxasında əyləşdiklərini gördüm. İmam mənə oturmağı təklif etdi. Masaya əyləşən kimi 20 manata görə ailə üzvlərimi, var-yoxumu söyməsinə görə ona iradımı bildirdim. Düşündüm ki, bəlkə peşman olub üzr istəyər. İmam isə üzümə qarşı “yaxşı eləmişəm, dediyim sözün arxasında da dururam, əlavə sözün varmı” deyərək təkrar söyüş söyməyə başladı.

İmamı öldürmək üçün götürdüyüm bıçağı çıxararaq sinə nahiyəsinə üç-dörd dəfə zərbə endirdim. İqor mənə mane olmağa çalışdı, amma zərbələrin qarşısını ala bilmədi. Əslində İqor onu da vuracağımdan ehtiyat edirdi. Amma belə bir niyyətim yox idi. Mən İmamı öldürməyə gəlmişdim. Artıq gözüm dönmüşdü. Zərbələri hardan necə gəldi vururdum, neçə zərbə vurmağımı xatırlamıram. Hər zərbəni vurduqca İmamı öldürmək istəyirdim. Elə zənn edirdim ki, bu zərbənin təsirindən ölə bilər.

Vurduğum zərbələrdən sonra İmamın ölmədiyini, ayağa qalxdığını görüncə əsəbiləşdin və bıçaqla boğazına bir neçə zərbə də endirdim. Onun yerə yıxıldığını görüb öldüyünə arxayın oldum və kafeni tərk etdim. Qapının çıxışında İqor köynəyimdən yapışaraq dartmağa başladı. Ətrafda olan şəxslərdən bir neçəsi ona köməklik etdi. Onların əlindən çıxıb qaçmaq istəyirdim ki, hadisə yerinə gələn polis əməkdaşları məni saxladı”.

Ş.Gülmətov ifadəsində İmamverdini öldürmək istəməsini bir daha etiraf edib, tutduğu əməldən peşman olmadığını söyləyib.

Məhkəmə prosesi avqustun 13-də davam edəcək. (virtualaz.org)

Ölkə.Az