Ana öldü, ər və iki aylıq körpə ağır vəziyyətdə

Faktla bağlı araşdırma aparılır

Cəlilabad rayonunda ailənin ehtiyatsızlığı faciəyə səbəb olub.

Hadisə rayonun Böyük Bəcrəvan kəndində İsrail Sayadulla oğlu Hüseynova məxsus evdə baş verib.

Belə ki, axşam saatlarında otağın qızdırılması üçün istifadə olunan elektrik sobası aşaraq evdəki xalçanı yandırıb. Bu zaman iki aylıq körpə, ər və arvadın olduğu otağı qatı tüstü bürüyüb.

Ailənin digər üzvləri yalnız səhər saatlarında hadisədən xəbər tutaraq onları tüstü ilə dolmuş otaqdan bayıra çıxara biliblər. Lakin tüstü və dəm qazı 22 yaşlı Gülarə Hüseynovanın həyatına son qoyub. Onun həyat yoldaşı və 2 aylıq körpəsi Hüseyn Hüseynov ağır vəziyyətdə Cəlilabad Mərkəzi rayon Xəstəxanasına çatdırılıblar. Onların vəziyyətlərinin ağır olduğu bildirilir.

Faktla bağlı araşdırma aparılır./Anspress/

Ölkə.Az