Bacısının başını kəsən qız azadlıqda
2014-cü ilin oktyabr ayında bacısının başını kəsdiyinə görə həbs olunan Şəki sakini Pərvanə Etibar qızı Nuriyeva azadlığa buraxılıb.
Ölkə.Az-ın əldə etdiyi məlumata görə, Bakının Xudu Məmmədov küçəsi 18 ünvanında kirayə yaşadıqları mənzildə 20 yaşlı bacısı Günel Nuriyevanın boğazını kəsərək öldürən Pərvanə Nuriyeva hazırda Şəki şəhərindədir. Bildirilir ki, Şəkinin imkanlı şəxslərindən hesab edilən Etibar Nuriyevin evi ciddi şəkildə qorunur, evə ailənin yaxın adamlarından savayı kimsə buraxılmır.
Səhiyyə Nazirliyinin mətbuat xidmətindən isə məsələyə bildirilib ki, P.Nuriyeva hazırda 1 saylı Respublika Psixiatriya Xəstəxanasındadır və müalicəsini davam etdirir.
Xatırladaq ki, Bakı Ağır Cinayətlər Məhkəməsinin qərarı ilə bacısını qətlə yetirən qız barəsındə məcburi xarakterli tibbi tədbirlərin tətbiq edilməsi ilə bağlı qərar çıxarılmış və o, müalicə edilməsi üçün Səhiyyə Nazirliyinin 1 saylı Respublika Psixiatriya Xəstəxanasına göndərilmişdi.
