WP: ABŞ İrana 850-dən çox "Tomahawk" qanadlı raketi atıb

ABŞ İranla davam edən dörd həftəlik silahlı münaqişə zamanı İslam Respublikasına 850-dən çox "Tomahawk" qanadlı raketi atıb.

Ölkə.Az xəbər verir ki, bunu "The Washington Post" (WP) mənbələrə istinadən yazıb.

Bildirilib ki, dəqiq idarə olunan sursatların sürətli istifadəsi bir neçə ABŞ müdafiə rəsmisini narahat edib və Pentaqonun döyüş hazırlığının necə yaxşılaşdırılması barədə müzakirələrə səbəb olub. Mənbələrə görə, bu raketlərin əksəriyyəti Tehrana qarşı hərbi əməliyyatın ilk günlərində atılıb.

Nəşrin qeyd etdiyi kimi, Pentaqon ABŞ ordusunun xidmətində olan raketlərin sayı barədə dəqiq məlumat dərc etməsə də, ildə cəmi bir neçə yüz ədəd istehsal edildiyi məlumdur.

Mənbələr vurğulayıblar ki, Müdafiə Nazirliyi istifadə olunan raketlərin sayını izləyir və onların istifadə sürətinin Vaşinqtonun İrana qarşı kampaniyasına və potensial gələcək hərbi əməliyyatlara necə təsir edəcəyini qiymətləndirir. Bir rəsmi mövcud rəqəmi "həyəcanverici dərəcədə aşağı" adlandırıb, digəri isə Pentaqonun Yaxın Şərqdəki "Tomahawk" ehtiyatlarını tezliklə tükəndirəcəyini bildirib.

Rəsmilərin sözlərinə görə, ABŞ həmçinin İranın bölgəyə hücumlarına cavab olaraq 1000-dən çox tutucu raket istifadə edib. Bunlara "Patriot" hava hücumundan müdafiə sistemləri və Terminal Yüksək Hündürlük Ərazi Müdafiəsi (THAAD) raketdən müdafiə sistemləri üçün raketlər daxildir. Bu silahların sayı da açıqlanmır və məhdud olduğu təxmin edilir.