"Qarabağ"dan Forlan açıqlaması

""Qarabağ" futbol klubunun Dieqo Forlanı transfer etmək istəməsiylə bağlı xəbər yanlışdır. Hətta mən bildiyimə görə, o karyerasını bitirmək istəyirdi".

Bu sözləri Ölkə.Az-a açıqlamasında "Qarabağ"ın mətbuat xidmətinin rəhbəri Nurlan İbrahimov səsləndirib. O, uruqvaylı futbol ulduzunun transferinin real olmadığını söyləyib. Qeyd edək ki, bu gün bəzi saytlar "Qarabağ"ın Forlanı transfer etmək istədiyini yazmışdı.

Xatırladaq ki, Forlan Dieqo Forlan 2014-cü ilin yanvar ayında Yaponiyanın "Cerezo Osaka" klubuna transfer olub. Futbolçu buna kimi dünyanın güclü klublarında çıxış edib. 2002-ci ildə "Mançester Yunayted"ə transfer olan uruqvaylı oyunçu 2 ildə 95 dəfə "qırmızı şeytan"ların formasını geyib. Forlan "M.Y."da 17 qol vurub. 2004-ci ilin avqust ayında ingilis klubundan ayrılan Forlan "Vilyareal"ın yolunu tutub. İspan klubunda 2004/05 mövsümündə vurduğu 25 qolla "Qızıl buts" mükafatını qazanıb.

2007-ci ildə İspaniyanın digər güclü klublarından "Atletiko"ya transfer olan Forlan 4 il bu klubun formasını geyib. 2011-ci ildə "İnter"lə razılaşaraq İspaniyadan ayrılıb. 2014-cü ildə isə İtalya nəhəngindən ayrılaraq Yaponiya klubu "Cerezo Osaka"ya keçib. Forlan hazırda bu klubun uğurları üçün tər tökür.

İntiqam VALEHOĞLU

Ölkə.Az