Avropa Oyunlarının məşəli Mərkəzi Aran rayonlarında

Bakı 2015-in alovunun səyahəti ölkənin mərkəz hissəsində davam edir.

Dünən, mayın 21-də məşəl karvanı bu zonanın iki rayonunda oldu.

Ucar şəhərinin mərkəzində məşəl yürüşü Koroğlu küçəsindən başlayaraq, Heydər Əliyev prospekti ilə davam etdi. Yol boyunca, Seymur Quliyevin başladığı estafetdə Raqif Qəhrəmanov, Nicat Zülfüqarov, Kazım Məmmədov, İbrahim Əhmədov, Elvin Mahmudov, Oruc Piriyev, Şükür Məmmədov və Fərid İsmayılov irəlilədilər.

Günün ikinci yarısında məşəl karvanı regionun iqtisadi və tarixi mərkəzlərindən olan, Şirvan düzünün şimal hissəsində Böyük Qafqaz dağlarının ətəklərində yerləşən Göyçaya yol aldı.

Ənənələrin yaşadığı bir rayonda məşəl etsafetini Ramin Əliyev başladı. Nizami küçəsindən keçməklə, Heydər Əliyev prospektində davam edən 2,28 km-lik estafet boyunca, Coşqun Əsgərov, Kamran Nuriyev, Kamran Baxışov, Niyazi Əhmədov, Elgün Məmmədov, Kənan Novruzov, Əziz Əzimov və İmran Novruzov yürüdülər. Namət Şirinov digər iştirakçılarla birlikdə Heydər Əliyev meydanında quraşdırılmış səhnəyə qədər irəlilədi.

Qeyd edək ki, Alov səyahətindən şəkillərə baxmaq, küçələrə axışan yerli sakinlərə qoşulmaq, Oyunlara aparan yolu işıqlandıran on məşəlçiyə azarkeşlik etmək, tədbirlərə qatılmaq istəyənlər www.flame.baku2015.com  linkinə daxil ola bilərlər.

Məşəl karvanı mayın 22-də Ağdaşdan keçəcək və günün sonunda Birinci Avropa Oyunlarının avarçəkmə yarışlarına ev sahibliyi edəcək Mingəçevirdə Alov festivalı ilə başa çatdırılacaq.

Ölkə.Az