Odessa Əhməd Ələsgərov ilə belə vidalaşdı

Cümə günü “Çernomorets” Odessa stadionunda Ukrayna, Azərbaycan, Tacikistan və Moldovanın əməkdar məşqçisi Əhməd Lətif oğlu Ələsgərov ilə vida mərasimi baş tutub.

79 yaşlı idman veteranı uzun sürən xəstəlikdən sonra may ayının 19-da vəfat edib.

“Bu insan bir çox futbolçulara futbol karyerasında vəsiqə verib. Əhməd Ələsgərovun istedad və rəhbərliyi sayəsində “Çernomorets” futbol klubu 1974-cü ildə SSRİ bürünc mükafatçısı olub və Avropa klublarında debüt edib”, şəhər şurasının mətbuat xidmətində qeyd ediblər.

Məşhur məşqçi və futbolçu ilə vidalaşmağa doğmaları və yaxınları, şəhər və vilayət rəhbərliyi, Azərbaycanın Ukraynadakı konsulluğunun nümayəndələri, məşqçinin yetirmələri (onların bir çoxu Odessaya müxtəlif ölkələrdən gəlib), “Çernomorets” FK-nın məşqçi heyəti və idmançıları, azarkeşlər və onu tanıyan və sevənlər gəlmişdilər.

Əhməd Lətif oğlu Ələsgərov 1935-ci il oktyabrın 5-də Bakıda anadan olub. 1955-ci ildən 1965-ci ilə qədər o, Azərbaycanın “Neftçi” komandasında oynayıb. 1963-cü ildə idman ustası olub. Futbolçu karyerası bitdikdən sonra, öz komandasına rəhbərlik edib, 1966-cı ildə “Neftçi”yə bürünc medal qazandırıb. 1968-ci ildə “Şərəf nişanı” ilə təltif edilib.

1973-cü ildən 1977-ci ilə qədər Əhməd Ələsgərov Odessanın “Çernomorets” komandasına məşqçilik edib.

O, 90-cı illərdə iki dəfə Azərbaycan yığmasına rəhbərlik edib. Eləcə də “Neftçi”nin baş məşqçisi olub.

2012-ci ilin sentyabr ayının 1-də “Çernomorets” FK-nın Fəxri Xiyabanında onun adı xatirə ulduzu kimi əbədiləşdirilib. Ağır xəstəliyə baxmayaraq Əhməd Lətif oğlu son günlərinə qədər Odessa vilayətinin Futbol Federasiyasının məşqçi komitəsinə rəhbərlik edib.oxu.az

Ölkə.Az