Böyükağa Hacıyev: "Futbol işbazları futbolu döndərib etdilər bazar..."

2014-2015-ci il futbol sezonuna yekun vuruldu. Artıq klublarımız yeni sezona hazırlaşır. Avrokuboklarda oynayan klublarımız təlim-məşq toplantısına erkən start veriblər.

Klublarımızın hal-hazırki vəziyyətini, futbolumuzun durumunu "Neftçi"nin keçmiş baş məşqçisi Böyükağa Hacıyev Ölkə.az-a dəyərləndirib.

Böyükağa Hacıyev: "Hər şeydən öncə məşqçi yer seçməzdən komandasını komplektləşdirməlidir. Komandanı kompakt vəziyyətə salandan sonra harasa təlim-məşq toplantısına getməlidir. Bu gün Azərbaycan futbolunda inkişaf görmürəm. Azərbaycan futbolu 3-4 il öncə bir sıçrayış etdi, çalışdı ki, yuxarı qalxsın və bunun nəticəsində əvvəlcə "Neftçi" sonra isə "Qarabağ" Avroliqanın qrup mərhələsinə düşdü. Bu artıq sıçrayış idi. Bu il bu sıçrayışı görməkdə çətinlik çəkəcəyik. Avrokuboklarada oynayan klublara diqqətlə nəzər salın. İçərilərində ən yaxşı vəziyyətdə olanı "Qarabağdır". "Qarabağ"dan da artıq bir neçə əsas oyunçu ayrılıb. "İnter" adlı klub var idi, ancaq indi onun varlığı və yoxluğu sübuta yetirilməlidir. "Neftçi" nə vəziyyətdədir bunu artıq hamı bilir. Bu klubların içərisində bir dənə "əlini oxutmayan" klub "Qəbələ"dir.

Azərbaycan futbolunda tənəzzül başlayıb. Bu gün klub prezidentləri küskündür. Neçə illərdir külli miqdarda pul xərclədilər, vəsait ayırdılar, ancaq bundan heç bir nəticə görmədilər. Futbol işbazları futbolu döndərib etdilər bazar. Bu gün bunun gübahı nə AFFA-dadır, nə də PFL-də, bunun günahı klub rəhbərlərindədir. Azərbaycanlı futbolçular da guya ağıllı davrandılar bu ərəfələr. 300 minlik müqaviləyə imza atan futbolçu özünə son model maşın, bahalı telefon aldı, bununla da fotbolu bitmiş bildilər. Burada artıq peşakarlıqdan söhbət getməlidir".

Səxavət Məmməd
Ölkə.az