"Neftçi" - "Zirə" oyununun nəticəsi ləğv olunacaq?

Xatırladaq ki, 1:1 hesabı ilə yekunlaşan qarşılaşmada "Neftçi"nin futbolçuları ilə hakim arasında yaşanan mübahisə paytaxt klubunun baş məşqçisi Yuri Vernidub, baş məşqçinin köməkçisi Dmitro Kara-Mustafa və futbolçu Breno Almeydanın qırmızı vərəqə alması ilə nəticələnib.

Bəs Azərbaycan futbolunda belə bir təcrübə varmı ki, sonradan qərarlar ləğv edilsin?

Mövzu ilə bağlı Ölkə.az-a danışan futbol jurnalisti və eksperti Elçin Cəfərov bildirib ki, ümumiyyətlə, bu mövsüm Azərbaycan futbolunda hakimlik bəlkə də tarixinin ən bərbad dövrünü yaşayır.

"Əvvəlki qarşılaşmalarda verilən qərarların, VAR-a baxmayaraq qəbul edilən qərarların birmənalı qarşılanmadığı hər kəsə məlumdur. Bunun ən pik nöqtəsi isə "Zirə"–"Neftçi" matçında yaşandı. Həm stadionda olanlar, həm də ekran qarşısında izləyənlər – ümumilikdə bütün futbol ictimaiyyəti həmin epizodun ofsayd olduğunu, "Zirə" futbolçusunun "Neftçi"nin qapıçısına maneçilik törətdiyini açıq şəkildə gördü və bunu təsdiqlədi.

564374 Amma nədənsə VAR tərəfindən görüşün baş hakimi İnqilab Məmmədova epizodu yenidən izləmək üçün çağırış edilmədi. Əgər obyektivlik axtarırıqsa, bu halda VAR danışıqlarının açıqlanmasını tələb etməliyik. Baş hakimlə VAR-da əyləşən hakimlər arasında hansı müzakirələrin getdiyini eşitdikdə yekun qərar deyə bilərik. Mövcud vəziyyətdə isə VAR-ın səhv etdiyi açıq görünür, çünki baş hakimin epizodu yenidən qiymətləndirməsi üçün çağırış gözlənilirdi, lakin bu baş vermədi.

Dünya praktikasında belə hallar tez-tez yaşanır. Hakim səhvləri hər zaman aktual olub. Amma bir məsələ var ki, səhvlə qərəzli qərar tamamilə fərqli anlayışlardır. Hesab edirəm ki, bu epizod oyunun nəticəsinə birbaşa təsir etməyəcək. "Neftçi" rəhbərliyi AFFA ilə görüşlər keçirib müəyyən məsələləri müzakirə etsə də, artıq olan olub, keçən keçib və zərər çəkən tərəf "Neftçi" olub".

Ekspert onu da qeyd edib ki, bu hadisənin gələcək oyunlarda hakimlərə psixoloji təzyiq yaradıb-yaratmayacağı da sual altındadır:

"Lakin "Neftçi" üçün həssas məqamda belə xal itkisi mövsümün sonunda turnir cədvəli formalaşarkən daha geniş müzakirə olunacaq və ciddi fikir ayrılıqları yaradacaq. Vərəqələrin ləğvi və ya digər qərarlar yalnız müvafiq komissiyanın qərarından sonra mümkündür, amma oyunun nəticəsi dəyişməyəcək.

Ümumilikdə isə bu mövsüm hakimlik Azərbaycan futbolunun ən ağrılı nöqtələrindən biridir. Hakim qərarlarının oyunlara və yekun nəticələrə ciddi təsiri hiss olunur. Təkcə "Neftçi" deyil, "Turan-Tovuz" da daxil olmaqla, demək olar ki, bütün klublar hakimlikdən narazılıqlarını açıq şəkildə ifadə edirlər. Bu da təbii ki, AFFA-ya yeni Hakimlər Komitəsinin sədri təyin edilən Rəhim Həsənovu heç də asan vəziyyətdə qoymur. Çox çətin bir mərhələyə sürükləyir. Məncə, Azərbaycan hakimliyində "bomba effekti", "zəlzələ effekti" yaradacaq dəyişiklik olmalıdır. Yeni hakimlər cəlb edilməlidir. Hazırkı hakim qrupunun bir çoxuyla, 70 faizi ilə artıq əməkdaşlığa son verilməlidir. Çünki son baş verən hadisələrdə biz daha çox qərəzli qərarlar hiss edirik".

Qeyd edək ki, sportinfo saytının yaydığı məlumata görə, baş hakim İnqilab Məmmədov və VAR-da əyləşən Nicat İsmayıllı cəzasız qalmayıb. Hakimlər Komitəsi hər iki hakimi 5 oyunluq cəzalandırıb. Onların mövsümün sonunadək təyinat almaması gözlənilir.

Həmidə İbrahimova