"Fənərbağça"nın prezidenti azadlıqdan məhrum edildi

Türkiyənin "Fənərbağça" futbol klubunun prezidenti Sadettin Saran məhkəmənin qərarı ilə azadlıqdan məhrum edilib.

Ölkə.Az xəbər verir ki, məhkəmə qanunsuz mərc oyunlarına təşviqdə ittiham olunan Saranın 2 il 6 ay müddətinə həbs edilməsinə hökm edib.

İşə sədrlik edən hakim təqsirləndirilən şəxslər Sadettin Saran və Alan Kənan Saranı “reklam və ya digər vasitələrlə idman yarışlarına əsaslanan sabit əmsallı və ya qarşılıqlı mərc və ya şans oyunlarında iştiraka sövq etmək” ittihamı ilə 2 il 6 ay həbs və hər birini 562 500 türk lirəsi məbləğində cərimələyib. 
Hakim digər təqsirləndirilənlər Emre Eren və Azadə Zeynep Haksala bəraət verib.

Qeyd edək ki, İstanbul Respublika Baş Prokurorluğu tərəfindən hazırlanan iddianamədə bildirilir ki, Radio Televiziya Üst Şurasına (RTÜK) qanunsuz mərc reklamlarının yer aldığı matç yayımlarının araşdırılması tələb olunub. 
RTÜK-ün prokurorluğa verdiyi cavaba istinad edilən ittihamnamədə 2023-cü ildə Saran İnternet Televiziya Yayım A.Ş.-nin nəzdində fəaliyyət göstərən “S SPORT” internet yayım platformasında futbol matçları zamanı qanunsuz mərc reklamlarının lisenziyasız yayımlandığı müəyyən edilib. Daha sonra bu reklamların stadionun reklam lövhələrində və hər iki qolun yanında yerləşdirildiyi bildirilib.

Billurə