Rəşad Sadıqov “Qarabağ”la matçdan danışdı

“Düşündüyümdən də səmərəli oyun alındı”.

"Ölkə.az" xəbər verir ki, bunu “Zirə”nin baş məşqçisi Rəşad Sadıqov “Qarabağ”la yoxlama oyunundan sonra deyib.

4:3 hesabı ilə başa çatan qarşılaşmadan sonra mütəxəssis komandasının hazırlıq prosesini və futbolçuların çıxışını dəyərləndirib:

“Düşündüyümdən də səmərəli oyun alındı. Hazırlığa gec başlamışıq, amma əslində planlaşdırdığımızdan da tez start verdik. Ayın 25-də başlamağı düşünürdük, sonra müəyyən səbəblərə görə plan dəyişdi. Buna baxmayaraq, futbolçular bu gün yüksək peşəkarlıq və əzmkarlıq göstərdilər. Düşünürəm ki, olduqca səmərəli oyun alındı. Futbolçular istədiyimiz yükləməni ala bildilər”.

Baş məşqçi avrokuboklardakı rəqibləri barədə də danışıb:

“Rəqib haqqında məlumatlar toplamağa başlamışıq. Onlar artıq 17 oyun keçiriblər, qarşıda bir oyunları da var. Bizimlə matça qədər çempionat oyunları olmayacaq. Bu baxımdan proqram onlar üçün daha uyğundur. Çempionatın davam etməsi onlara üstünlükdür. Üstəlik, bizimlə oyun öncəsi fasilənin olması da daha yaxşı hazırlaşmaları üçün şərait yaradır”.

Rəşad Sadıqov komandasını gərgin oyunların gözlədiyini vurğulayıb:

“Təcrübəli futbolçulardan qurulmuş komandadır. Düşünürəm ki, bizi maraqlı oyun gözləyir. Burada vacib olan birinci oyundur. Hansı komanda öz keyfiyyətləri üzərindən daha yaxşı oynaya biləcək? Bizi iki gərgin və maraqlı oyun gözləyir”.

Mütəxəssis komandadan ayrılan futbolçular barədə də fikirlərini bölüşüb:

“Tiago Silvanın da, Qomesin də komandada qalmasını istəyirdim. Əlavə transferlər etməyi planlaşdırırdıq və yenə də planlaşdırırıq. Hər ikisi ilə danışığımız oldu, qalmaqlarını istəyirdik. Amma fərqli qərar qəbul etdilər. Mən onların qərarını anlayışla qarşılayıram və gələcək karyeralarında uğurlar arzulayıram. Xüsusilə bu iki futbolçuya qarşı böyük simpatiyam var idi. Bəlkə gələcəkdə yenə birlikdə işləmək qismət olar”.