"Zirə"dən tarixi darmadağın: Azərbaycan futbolunda ikiqat yubiley gecəsi
Ölkə.az Peşəkar Futbol Liqasının rəsmi saytına istinadən xəbər verir ki, Sumqayıtda baş tutan oyun Azərbaycan klublarının qitəmiqyaslı klub turnirlərində keçirdiyi ümumilikdə 500-cü qarşılaşma kimi tarixə düşüb.
Təmsilçilərimiz UEFA Çempionlar Liqasında 120, UEFA Avropa Liqasında (əvvəl UEFA Kuboku) 283, UEFA Konfrans Liqasında 63, Kuboklar Kubokunda 8, İntertoto Kubokunda 26 görüşə çıxıblar. Bu qarşılaşmalardan ikisi nəticəsi ləğv olunduğu, biri baş tutmadığı üçün texniki nəticə ilə yekunlaşıb. Həmin texniki nəticələri nəzərə almaqla 159 qələbə qazanan klublarımız 112 heç-heçə edib və 229 dəfə uduzub.
Qitə kuboklarında debüt 1994/95 mövsümündə gerçəkləşib. 1994-cü il avqustun 9-da "Turan" Türkiyədə "Fənərbağça"ya 0:5 hesabı ilə uduzub.
"Zirə"nin futbolçusu Ruan Renatonun "Torpedo Kutaisi" ilə görüşdə vurduğu ilk top Azərbaycan klublarının avrokuboklarda 550-cü qolu olub. Texniki nəticələrin nəzərə alınmadığı top fərqi 552-759-dur.
Azərbaycan komandalarının ilk qolu 1995/96 mövsümündə qeydə alınıb. UEFA Kubokunun 1995-ci il avqustun 22-də keçirilən "Austriya" (Vyana, Avstriya) - "Kəpəz" görüşündə (5:1) Yadigar Süleymanov fərqlənib.
Qeyd edək ki, "Zirə" Gürcüstan təmsilçisinə 3:0 hesabı ilə qalib gəlib.
