"Barselona" "Kamp Nou"nu tərk edir: UEFA qaydaları və yeni stadion
"Barselona" klubu 2027/28 mövsümünün ilk yarısında rəqiblərini əfsanəvi "Kamp Nou" stadionunda qəbul edə bilməyəcək.
Ölkə.az xəbər verir ki, buna əsas səbəb kimi arenada həyata keçiriləcək dam örtüyünün tikintisi işləri göstərilir.
Kataloniya təmsilçisi ev matçlarının müvəqqəti olaraq "Lluis Companys" Olimpiya Stadionuna köçürülməsi üçün artıq La Liqa rəhbərliyinə rəsmi müraciət ünvanlayıb.
Məlumata görə, sözügedən tikinti işlərinə 2027-ci ilin iyun ayında start veriləcək və prosesin təxminən 4-5 ay davam edəcəyi proqnozlaşdırılır.
Lakin UEFA-nın mövcud qaydalarına əsasən, komandalar Çempionlar Liqasının qrup mərhələsindəki bütün ev oyunlarını eyni stadionda keçirməlidir. Məhz bu tələbə görə "Barselona" 2028-ci ilin yanvar ayınadək çıxışını qeyd olunan ehtiyat arenada davam etdirmək məcburiyyətində qalacaq.
