"AFFA prezidenti və AFFA-nın baş katibi Azərbaycan xalqından üzr istəməlidir"
Azərbaycan millisinin Xorvatiyaya 6:0 hesabı ilə məğlub olması ictimaiyyət və futbol azarkeşləri tərəfindən birmənalı qarşılanmayıb. Belə ki, gedən müzakirələr zamanı əksəriyyət millimizin yaşıl meydana sadəcə 90 dəqiqəni “yola vermək” naminə çıxdığını şərh edib.
Ölkə.Az olaraq bu mövzuda ölkənin tanınmış simalarının fikirlərini öyrənməyə çalışdıq:
Fazil Mustafa: “Azərbaycan millisinin məğlubiyyəti əslində gözlənilən məğlubiyyət idi. Futbol çempionatından olan ümumi səviyyə milliyə də öz təsirini göstərir. Millini xüsusi sehirli çubuqla bir yerlərə gətirmək olmaz ki...İtaliya ilə bütün enerjini sərf edəndən sonra komandanın ikinci bir oyuna 3 günlük məsafadə fiziki cəhətdən müqavimət göstərməsini gözləmək sadəlövhlük olardı. Xorvatiya da kifayət qədər ciddi bir komandadır. Hər halda, biz futbol oynamağı öyrənməliyik. Son məğlubiyyət Azərbaycanın bugünki potensialına, futbol imkanlarına uyğun bir məğlubiyyətdir, çünki başqa cür də gözləmək olmaz. Uşaq futbolu kifayət qədər inkişaf etmir. Futbol meydançalarının hamısının qapısı bağlıdır, ancaq yüksək məbləğdə pul ilə içəri daxil olmaq olar. Nəzərə alsaq ki, yaşayış yerlərində uşaq futbolunun inkişafı üçün meydançalar yoxdur, nəticənin sonda belə olması adi haldır. Aşağıdan futbolun inkişafına kömək edən şərait olmalıdır”.
Zahid Oruc: Əlbəttə, futbolda istənilən nəticə ola bilər, çünki çox güclü komandalarda da hallar baş verir.Lakin təəssüf ki, Azərbaycan millisi klub komandalarımızdan da zəif nəticə göstərir. Düzdür,vəziyyət 10 il bundan qabaqkından fərqlidir.İndi onlar real olaraq topu tanıyırlar, ondan qorxmurlar,meydanda panika yaşamırlar.Üstəlik rəqibin adı onları qorxutmur,isterikaya salmır,amma demək olmaz ki, millimizdə köklü dəyişiklik baş verib.Onların məğlubiyyətinə dözmək olardı,əgər komandamız həqiqi taktiki peşəkarlığa və normal oyun üslubuna malik olsaydılar.Əfsuslar ki,onların sərgilədiyi oyun çox aşağı səviyyədədir və belə durumla İtaliyanın 2-ci liqasında da çıxış etmək olmaz.
Xorvatiyanın əhalisi bizdən iki dəfə azdır,bununla belə yaratdıqları məktəb hesabına dünya reytinqində yüksək yerlərə layiq görülən komanda və oyunçular formalşdıra biliblər.Yəni, güclü olmaq üçün 100 milyonlarla əhali sayına və milyardlarla dollar vəsaitə malik olmaq mütləq deyil. Sadəcə bunu on illərin strateji işi və hazırlığına dayanaraq çalışan ixtisaslaşmış idman klublarının ixtiyarına vermək lazımdır.Əks halda futbola qoyulan bu qədər vəsait millətin belə təhqir olunmasına gedəcək.
Dünənki nəticə hamımızı üzdü,amma qətiyyən təccüblü deyildi.Çünki xorvatlar bizim oyunçulara dərs keçdilər ki,xalqı aldatmaq olmaz.Millətimizin azarkeşliyini bu idman növünə qoyulan ən böyük və ən güclü investisiya kimi dəyərləndirmək lazımdır.Adamlar səbirsizliklə gözləyirlər ki,onları təmsil edənlər nəhayət ki,keçmiş rüsvayçılıqlardan nəticə çıxaracaqlar və daşıdıqları formanın məsuliyyətini dərk edəcəklər.Lakin tamaşaçılırımıza yaşadılan ürək ağrıları və utanc hislədir.Halbuki başını aşağı tutmalı olan məhz o adamlardı.
Sual olunur, bu qədər öz qapısına qol vuran hansı milli tanıyırsız ?.Yaxud da ki, bu hesaba o topların hamısını götürüb gəlsəydilər, xeyli sayda top əldə etmiş olardıq - fiziki mənada. Ona görə də, bunu çox pis qarşılayıram və hesab edirəm ki, bunu başqa milli komandaların məğlubiyyəti ilə eyniləşdirib təskinlik tapmaq olmaz. Onlar bundan nəticə çıxartmalıdırlar. Həqiqətən də düşünməlidirlər ki, dövlət tərəfindən idmana külli miqdarda vəsait ayrılır. Bu pullar qarşılığında onların yaxşı oynamamağa haqqı yoxdur. Onlar hər biri dərk etməlidir ki, yaşıl meydanda sadəcə 90 dəqiqəni öldürmək naminə çıxmayıblar. Üzərlərindəki missiyanın milli mənasını anlamadılar. Məncə, onların çox az bir hissəsi bu barədə fikirləşir və bizə yeni “11 nəfər döyüşçü” lazım olduğunun mesajını verirlər.
Sərdar Cəlaloğlu: “Mən bir o qədər futbol həvəskarı deyiləm, amma bir şeyi bilirəm ki, Azərbaycanda idman dövlət siyasətində o qədər müstəsna yer tutur ki, bütün buna baxmayaraq idman sahəsindən əldə etdiyimiz nailiyyətlər ölkənin idmandan daha az mailiyyə vəsaiti qoyulmuş sahələrindən də qat-qat aşağıdır. Bu da hakimiyyətinin idman siyasətinin yanlış olduğunu göstərir. Təkcə futbolda deyil, başqa idman növlərində də rüşvətlə seçimlər edilir. Bizim idmanda əldə etdiyimiz uğurlar xaricdən gətirilən idmançıların hesabına əldə edilir. Bu sahədə heç bir nailiyyətimiz yoxdur. Bir daha təkrar edirəm ki, bizdə idman siyasəti yanlış qurulubdur. Əgər doğrudan da bu qədər kapital qoyulub, bu qədər uğursuz nəticə alınırsa, demək aparılan idman siyasətində hansısa qüsur var. Qüsurun əsasını isə korrupsiya təşkil edir. Korrupsiya özünün pis izlərini həmişə buraxır. Xüsusi qabiliyyəti olan insanlar kənarda qalır, tanışlıqla dostluqla nisbətən qabiliyyətsiz insanlar seçilir ki, onlar da gedib Azərbaycanı belə pis vəziyyətə salırlar”.
Üzeyir Cəfərov: “AFFA prezidenti, AFFA-nın baş katibi Azərbaycan xalqından üzr istəməlidirlər. Ümumiyyətlə, bu biabırçılığı yığışdırmalıdırlar. Rövnəq Abdullayev, Elxan Məmmədov və Berti Foks arasında hansısa biznes əlaqəsi var. Ona görə ki, Almaniyada işsiz qalan bir yaramazı Azərbaycan xalqına sırıyıblar və bunlar da xalqımızı təhqir edə-edə gedir. O pullar ki Berti Foksa verilir ona qətiyyən ehtiyac yoxdur. Azərbaycanda 11 nəfər qeyrətli, futbolu oynamağı bacaran və futboldan baş çıxaran insanlar var. Elxan Məmmədovun hər dəfə futbol olanda dostların, tanışların yanına yığıb xaricə aparması bizim pullar hesabına, bunlara son qoyulmalıdır. Azərbaycan nə qədər ki, uşaq futbolunu təkminləşdirməyib biabırçılıq davam edəcək. Berti Foksun balaca boyu hiyləgərliyinə görədir. Oyundan sonra çıxıb deyir ki, "mən bundan sonra Azərbaycanda işləməyim bir qədər çətin olacaq. Mən üzərimə düşəni elədim, oyunçular etmədi". Oyunçular elə onun simasın göstərdilər. Berti Foksu Bakıya buraxmaq lazım deyil".
Siyavuş Novruzov: Bu futboldur, futbolda hər şey ola bilər. Brazilya kimi komanda 8-o uduzmuşdu. Yəni bu fuboldur, bunu proqnazlaşdırmaq olmur. Burda əsas şərtlər oyunçuların fiziki hazırlığa, əhval ruhiyyəsi, bütün hər bir şey oyuun gedişinə təsir göstərir. O baxımdan da, burda qeyri-adi bir şey yoxdur. Uda da bilər, uduza da...
Aqil Abbas isə məsələyə ironik yanaşdı...
Aqil Abbas: “Yaxşı qurtardıq, çox sevinirəm. Bu 10-da ola bilərdi, 13-də ola bilərdi (gülür). Foqtsu təbrik edirəm ki, heç olmasa 6-0 qutardıq. Yoxsa dirəklərə filan dəyməklə 10 ola bilərdi. Mən çox sevindim ki, yaxşı qurtardıq, yoxsa biabır olacaqdıq. Oyunçular çox yaxşı, güclü oynadılar. Bir futbolçunu iki dəfə dəyişmək, mükəmməl idi. Foqtsun bu yeniliyi mənim çox xoşuma gəldi”.
Xatırladaq ki, dünən AVRO-2016-nın seçmə mərhələsinin növbəti oyununda Xorvatiya ilə üz-üzə gələn millimiz 6-0 hesabı məğlub olub.
Fatimə İbrahimova
Ölkə.Az
