“Üzücü olacaq”
Avropa Liqasının qrup mərhələsinin sonuncu turunda keçirilən "Qarabağ" - "Fiorentina" matçı təmsilçimizin məğlubiyyəti ilə başa çatıb - 1:2.
Ölkə.Az qafqazinfo-ya istnadən xəbər verir ki, qarşılaşmadan sonra ağdamlıların çalışdırıcısı Qurban Qurbanov məğlubiyyəti şərh edib.
“Deyiləcək söz yoxdu. Futbolçularıma təşəkkür edirəm. Bu komandaya qarşı oynamaq asan deyildi. Rəqibin ustalıq səviyyəsi göz önündədi. Amma sadə qollar buraxdıq. Futbolçularım layiqli oyun nümayiş etdirdilər. Biz də rəqibi topsuz qoya bildik. Hər kəsə "çox sağ ol" demək istəyirəm. Belə havada bizi dəstəkləyən azarkeşlərə minnətdaram. Onları məyus etmək istəməzdim. İtaliyanın fərqli bir komandasının oyununa baxmaq maraqlıdı. Gələcəkdə "Fiorentina"ya azarkeşlik edəcəm”.
- Artıq "Qarabağ" üçüncü dəfədi qrupdan çıxa bilmir. Düşünmürsüz ki, artıq daha güclü futbolçuları transfer edib istəyə çatmaq zamanıdı?
- Ümumi o səviyyəyə gəlib çatmağımız üçün çempionatın səviyyəsi qalxmalıdı. Bir komanda ilə iş düzəlmir. Bütün komandaların gücü eyni olmalıdı. Ölkə olaraq gəncik. Digər Avropa ölkələrinin bu sahədə təcrübəsi var. Daha yaxşı transfer etsək də, rəqiblər də eyni addımı atır. Biz irəli getmək istəyiriksə, transferlərimizin keyfiyyəti yüksək olmalıdı. Öz oyunçularımdan razı qaldım. Belə oyunların sayı çox olsa, onların təcrübəsi daha da artacaq. Bizim kimi digər klublarımız da güclənməlidi. İndiki durumla şikayətlənməli deyilik. Nəzərə alaq ki, qrupdan çıxmağa şansımız var idi. Görünür, hardasa səhv etmişik.
- Bu Rəşad Sadıqovun son oyunu idi?
- Xeyr!
- Düşünmürsüz ki, "Qarabağ" legioner limitinin qurbanı oldu?
- Bu gün limitdən şikayətlənmək düzgün olmaz. Dediyim kimi, şansımız oldu. Təcrübə qazandıq. "İnter"dən sonra "Fiorentina"ya qarşı oynadıq. Hər ikisi də ağır oyun oldu. Hər ölkə öz futbolunun inkişaf etməyi üçün müəyyən addımlar atır. Bizdə də bu işlər görülür. Ümumi Azərbaycan futbolu formalaşmayıb. Bunun üçün zamana ehtiyac var. Bu, təkcə limitlə bağlı həll olunan məsələ deyil. Rəqiblərimiz bizdən çox-çox irəli gediblər.
- Komandanı çempionata motivasiya etmək çətin olmayacaq ki?
- Üzücü olacaq. Bunu soyunub-geyinmə otağında da gördüm. Ən azından bərabərlik istəyirdilər ki, azarkeşlər evlərinə rahat getsinlər. Çalışacağıq komandanı çempionata motivasiya edəcək.
- Hər iki oyunda məğlub etdiyiniz PAOK qrupdan çıxdı...
- Qrupdan çıxa bilməməyimiz bizə təsir etdi. PAOK qrupdan çıxmağa layiq idi. Baxmayaraq ki, biz onları məğlub etmişdik.
