"Bakcell Arena" stadionundakı təxribatçılardan 2-si saxlanılıb

Xəbər verdiyimiz kimi, dünən Avropa Liqasının üçüncü təsnifat mərhələsi çərçivəsində Bakının "Neftçi" və  Gürcüstanın "Çixura" futbol komandaları arasında keçirilən oyunda Gürcüstandan gəlmiş bəzi  azarkeşlər tərəfindən təxribat törədilməsinə cəhd edilib.

Azərbaycan Daxili İşlər Nazirliyinin məlumatına görə, onlar oyunun keçirildiyi "Bakcell Arena" stadionunda yer aldıqları tribunadan Azərbaycanın Zaqatala və Qax rayonlarının Gürcüstan ərazisi kimi göstərildiyi xəritə asıblar. Bu isə yerli azarkeşlərin kəskin etirazına səbəb olub və nəticədə qarşıdurma yaranıb. Xidməti ərazidə ictimai asayişin və təhlükəsizliyin qorunmasına cəlb olunmuş polis və Daxili Qoşun əməkdaşları tərəfindən görülmüş operativ və qətiyyətli tədbirlər nəticəsində hadisənin kütləvi iğtişaşa çevrilməsinin qarşısı alınıb. 

Rəsmi məlumata görə, hər iki ölkənin hüquq-mühafizə orqanları tərəfindən araşdırmalar aparılır.

Hüquq-mühafizə orqanlarındakı mənbənin verdiyi məlumata görə, hadisə zamanı canfəşanlıq edən 5 nəfər gürcü fanatdan 2-si saxlanılıb.

“Polis əməkdaşları həmin bayrağı görən kimi bunun təxribat olduğu müəyyənləşdirildi. Gürcü azarkeşlər arasında bəlkə də ermənilər tərəfindən öyrədilmiş bir neçə nəfər daha çox canfəşanlıq edirdi. Onlardan biri qəfildən bizim azarkeşlərə hücum etdi. Sanki 1 nəfər 10 min nəfərə qarşı çıxırdı. O, stadionda hər kəsi təhqir edirdi. Onu sakitləşdirdik və başa saldıq ki, gürcü xalqının tarixi kimi təqdim etdikləri bayraq əslində qondarmadır. 30-a yaxın gürcü fanatdan 5 nəfər təxribatla məşğul idi. Bizim rəhbərlik onları başa salıb sakitləşdirdi. Amma 2 nəfər sakitləşmək bilmirdi və buna görə onlar təxribatçılar kimi saxlanıldılar”-deyə . hüquq-mühafizə orqanlarından bildirilib./modern.az/

Ölkə.Az