Avtomobil qəzasına uğrayan futbolçu 90 min avro cərimə ödəyəcək

Almaniyanın "Borussia Dortmund" klubunun portuqaliyalı futbolçusu Rafael Qerreyro avtomobil qəzası törədib.

"Ölkə.Az" xəbər verir ki, qarşısındakı avtomobilə çırpılan futbolçu hadisə yerindən qaçıb. Qəzada qarşı tərəfə 500 avro ziyan vuran Qerreyro 90 min avro dəyərində cəzalandırılıb.

Avtomobili ilə yol ayrıcında "Üstünlük sağdan hərəkət edənindir"-qaydasına məhəl qoymayaraq yola çıxan futbolçu başqa bir avtomobil ilə toqquşub. Bir qadının idarə etdiyi avtomobilə 500 avro ziyan dəyib. Qəzadan sonra avtomobilindən enərək nə baş verdiyinə baxan Qerreyro qarşı tərəfə heç nə demədən hadisə yerindən uzaqlaşıb. 120 min avro cərimə və 9 ay sürücülük hüququndan məhrum etmə cəzası tələbi ilə iş məhkəməyə göndərilib.

Futbolçu hadisə yerindən qaçdığı üçün haqqında cinayət işi açılıb. Onun vəkili isə "Almanca danışa bilmədiyi üçün panikaya qapılıb hadisə yerini tərk edib. Qısa bir müddət sonra səhvini başa düşüb. Menecerinə zəng etsə də, qarşı tərəfə zəng çatmayıb. Sonra isə birlikdə polisə gedərək ifadə verib"-deyib.

Məhkəmənin hökmü ilə futbolçu 9 ay müddətində bir xeyriyyə qurumuna 10 min avro pul ödəyəcək.