Azərbaycan qazının Avropaya ixracı üzrə layihələrin dəyəri 48 milyard dollar qiymətləndirilir

Azərbaycan qazının Avropaya tədarükü ilə bağlı layihələrin reallaşdırılmasına yönəlmiş investisiyalar 45-48 milyard dollara çatacaq.

Bu barədə neft-qaz sənayesinin işçilərinə dövlət mükafatlarının təqdim olunması mərasimində ARDNŞ-nin (Azərbaycan Respublikası Dövlət Neft Şirkəti) prezidenti Rövnəq Abdullayev deyib.

Onun sözlərinə görə, xüsusilə, bu investisiyalar “Şahdəniz-2” layihəsini, Cənubi Qafqaz qaz kəmərinin genişləndirilməsi layihəsini, Transanadolu və Transadrikatik qaz kəmərlərinin tikintisi layihələrini əhatə edəcək.

R.Abdullayevin sözlərinə görə, ARDNŞ Türkiyədə neft emalı zavodunun, konteyner limanının tikintisi layihələrini reallaşdıracaq, bu ilin sonu - gələn ilin əvvəllərində yeni elektrik stansiyasının tikintisinə başlayacaq.

O, qeyd edib ki, ARDNŞ ölkə daxilində də işləri davam etdirmək niyyətindədir. Şirkət neft və qaz hasilatı həcmlərinin artırılması, Heydər Əliyev adına Bakı Neft Emalı Zavodunun yenidən qurulması, ümumi dəyəri 8 milyard dollar olan yeni qaz emalı zavodunun və qaz-kimya kompleksinin tikintisi üzrə işlərin görülməsini planlaşdırır.(Trend)

Ölkə.az