İqtisadçı: "Rublun inflyasiyasının Azərbaycana mənfi təsiri olmayacaq"

Moskva birjasında rublun getdikcə dəyərdən düşməyə başlaması qonşu dövlətləri, o cümlədən Azərbaycanı da narahat edir.

Nəzərə alsaq ki, Azərbaycanın valyuta rezervləri arasında müəyyən miqdar rubl da var, o zaman bu məsələnin ciddi iqtisadi təhlilə ehtiyacı yaranır.

İqtisadçı ekspert Qadir İbrahimli Ölkə.az-a rublun qiymətinin düşməsinin Azərbaycana mümkün təsirlərindən danışıb.

"Rublun qiymətində baş verən dəyişikliyin Azərbaycan iqtisadiyyatına təsirləri bir o qədər də güclü deyil. Yəni bunlar lokal təsirlərdir. Bunun müsbət cəhətləri də var. Yəni rublun qiymətinin düşməsi ilə bağlı Rusiyadan Azərbaycana idxal olunan məhsulların qiyməti ucuzlaşa bilər.

Bütövlükdə götürəndə isə təsirlər lokal təsirlərdir. Çünki Azərbaycanın ticarət dövriyyəsində Rusiyanın payı cəmi 18%-dir. Bu baxımdan ciddi təsirlər gözlənilmir. Dolayı təsirlər təbii ki, var, amma bunlar heç bir ciddi hadisələrə səbəb ola bilməz. Azərbaycan Dövlət Neft Fonduda rublun əhəmiyyətinə gəlincə, fondda onun elə də əhəmiyyətli çəkisi yox idi. Təbii ki, müəyyən ziyan olacaq, ancaq bütövlükdə neft fondunun vəsaitlərinə təsir edəcək qədər ciddi ziyan gözlənilmir".

Qeyd edək ki, ARDNF-nin rubla investisiya yatırdığından sözügedən valyutanın dəyərinin aşağı düşməsi ilə fondun aktivlərinin azalacağı proqnozlaşdırılır.

Fatimə İbrahimova
Ölkə.az