Son beş ildə Azərbaycanın real vəziyyəti

“Ölkə.Az” xəbər verir ki, 2017-ci ildə ölkə rezidentləri tərəfindən istehsal edilmiş ümumi daxili məhsul (ÜDM) 70 135,1 milyon manata çatıb ki, bu da 2012 –ci illə müqayisədə 7,7 dəfə çoxdur. Əhalinin hər nəfərinə düşən ÜDM 4 186,3 ABŞ dolları təşkil edib ki, bu da 2012 –ci ilin (son 5 il) müvafiq dövrü ilə müqayisədə  3 304,2 dollar və ya 44,1% azdır.

Mədənçıxarma sənayesində istehsalın ümumi dəyəri 27,7 milyard manat olmaqla son 5 illə müqayisədə 2,1 milyard və ya 8,2% artıb.

2017 –ci ilin yekununda Azərbaycanda neft məhsullarından avtomobil benzininin istehsalı 5,4 faiz, sürtkü yağlarının istehsalı 3,6 dəfə, neft bitumunun istehsalı 32,4 faiz və neft koksunun istehsalı 10,6 faiz artmış, ağ neftin istehsalı 6,3 faiz, yanacaq mazutunun istehsalı 45,2 faiz, dizel yanacağının istehsalı isə 18,1 faiz azalıb.

Tikinti materiallarının istehsalı sahəsində fəaliyyət göstərən müəssisələr tərəfindən istehsal edilmiş məhsulun ümumi dəyəri 567,8 milyon manat təşkil edib ki, bu da son 5 illə müqayisədə 256,1 milyon manat və ya 82,1% çoxdur.

Elektrik enerjisi, qaz və buxar istehsalı, bölüşdürülməsi və təchizatı sektorunda 2017-ci il ərzində 1 832,7 milyon manat dəyərində məhsul istehsal olunub ki, bu da son 5 illə müqayisədə 928 milyon manat və ya 10 dəfə azdır.

2017-ci ildə qeyri-neft sektorunun inkişafına 7 102,2 milyon manat sərf edilib ki, bu da son 5 illə müqayisədə 4 588,3 milyon manat və ya 39,2% azdır. Neft sektoruna isə 8 448,6 milyon manatlıq vəsait yönəldilib ki, bu da son 5 ildə  4 800,6 milyon manat çoxdur.

2017-ci ilin yanvar-dekabr ayları üzrə kənd təsərrüfatının ümumi məhsulunun dəyəri faktiki qiymətlərlə 6580,0 milyon manat təşkil edib ki, bu da son 5 ildə 1 816,3 milyon manat və ya 38,1% çoxdur.

2017 –ci ilin yekunlarında bankda olan  kreditlərin ümumi həcmində vaxtı keçmiş kreditlərin xüsusi çəkisi 15,5% təşkil edib ki, bu da son 5 illə müqayisədə 2,4 dəfə çoxdur.

2017 –ci ilin yekunlarında Azərbaycanda işsiz statusu verilmiş şəxslərin sayı 38 500 nəfər təşkil edib ki, bu da son 5 ilin müvafiq dövrü ilə müqayisədə 1 709 nəfər çoxdur.

2017-ci ilin yanvar-noyabr aylarında ölkə iqtisadiyyatında muzdla çalışan işçilərin orta aylıq nominal əmək haqqı 529 manat təşkil edib ki, bu da son 5 ildə cuzi olaraq 138 manat artıb.

İlkin məlumatlara əsasən 2018-ci ilin əvvəlinə ölkədə 32,3 min həkim və 54,6 min orta tibb işçisinin çalışdığı 571 xəstəxana və 1760 ambulatoriya-poliklinika müəssisəsi fəaliyyət göstərir və əhalinin hər 10 min nəfərinə orta hesabla 33 həkim və 56 orta tibb işçisi düşür. Sonuncu 5 ildə isə əhalinin hər 10 min nəfərinə orta hesabla 35 həkim və 63 orta tibb işçisi düşür.

2017 –ci ilin yekunlarına əsasən aparılan uğurlu islahatlar nəticəsində əhalinin təhsil səviyyəsi ilbəil artır və bu gün 15 və yuxarı yaşlı əhalinin hər 1000 nəfərindən 972-si ali, orta ixtisas və orta təhsilə malikdir ki, bu da sonuncu 5 ilə görə 3 nəfər çoxdur.

İlkin məlumatlara əsasən, 2018-ci ilin əvvəlinə ölkədə müxtəlif elmi-texniki xidmətləri həyata keçirən 135 elmi təşkilat və müəssisə fəaliyyət göstərib ki, bu da son 5 ilə görə 8 elmi təşkilat azdır.

Qeyd edək ki, bütün məlumatlar Azərbaycan Statistika Komitəsinin 5 illik statistik məlumatlarına istinadən verilir.

Odər Qəni

Ölkə.Az