Azərbaycanda siqaretin qiyməti ilə bağlı

Azərbaycanda yaxın vaxtlarda tütün məhsullarının qiymətinin artması gözlənilmir. 

Bunu “European Tobacco Baku” ASC-nin İdarə heyətinin sədri Rüfət Quliyev Milli Məclisin Vergi Məcəlləsində ölkədə istehsal edilən tütün məmulatlarının aksiz dərəcələrinin artırılması ilə bağlı qəbul etdiyi dəyişikliklərlə əlaqədar siqaretin qiymətinin artması ehtimalını şərh edərkən deyib.

Onun sözlərinə görə, siqaretin qiyməti hələ dəyişmir: “Bu, siqaretin qiymətinə bir neçə faktorun daxil olması ilə əlaqədardır”.

R.Quliyev qeyd edib ki, daha uzaq gələcəkdə qiymətin artması məsələsi bazarın özündən asılıdır: “Bu, bazarda təklifin və tələbatın nisbətindən, onun tutumundan və s. asılıdır. Üstəlik, məsələnin iqtisadi tərəfindən başqa, sosial tərəfi də mövcuddur. Hazırda topdansatışla məşğul olanlar və əlaqə qurduğumuz, siqaret satışını təşkil edən şirkətlər qiyməti artırmaq istəmirlər”.

ASC sədri əlavə edib ki, hazırda qiymətin indiki vəziyyətinin nə vaxtadək davam edəcəyini söyləmək çətindir: “Bazarın təhlili aparılacaq və buna müəyyən vaxt tələb olunur. Əlbəttə ki, aksizlərin artırılması adətən yekunda siqaretin qiymətinin artmasına gətirib çıxarır, lakin hazırda bazar və sosial faktorlar ondan xəbər verir ki, yaxın vaxtlarda qiymət əvvəlki səviyyədə olacaq. Azərbaycanda tütün məmulatlarının qiymətləri MDB-də ən aşağı, dünyada isə ən aşağılardan biridir”.

Qeyd edək ki, Azərbaycan Milli Məclisinin qəbul etdiyi Vergi Məcəlləsində dəyişikliklərə əsasən, 2015-ci ildən 1000 ədəd siqar, ucları kəsilən siqarlar və siqarillanın (nazik siqarlar) qiymətində aksizin payı 10 manat həcmində, tütündən hazırlanmış siqaretlər və onun əvəzediciləri üçün yeni spesifik aksiz dərəcələri 1000 ədədə görə 4 manat təşkil edəcək.

Bunadək tütün məhsullarının bütün növlərinin qiymətində aksizin payı 12,5 faiz olub. (trend)

Ölkə.Az