Ölkənin kanalizasiya sistemi yenidən qurulacaq

Sədr açıqlama verdi.

Dünya Bankının krediti ilə respublikanın 8 rayonunda içməli su və kanalizasiya sistemlərinin yenidən qurulması, 15 rayonda təsərrüfatdaxili suvarma və drenaj şəbəkələrinin təmir-bərpası və tikintisi işləri davam etdiriləcəkdir.

Ölkə.Az xəbər verir ki, bu sözləri “Meliorasiya və Su Təsərrüfatı” ASC-nin sədri Əhməd Əhmədzadə Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramının icrasının birinci ilinin yekunlarına həsr olunan konfransda çıxışı zamanı bildirib.

Sədr Kür və Araz çaylarında sel və daşqınlara qarşı görülən tədbirlərdən danışıb:

“Sel və daşqınlara qarşı Kür, Araz və dağ çaylarında 1000 kilometrdən artıq sahilbərkitmə, bəndlərin möhkəmləndirilməsi işləri həyata keçirilib”.

Sədr, həmçinin 3400 hektar torpaq sahələrində meliorativ tədbirlərin həyata keçirilməsi üçün tikintisi həyata keçirilən su anbarından danışıb:

“Taxtakörpü su anbarının tikintisi ilə əlaqədar 30 min hektara yaxın yeni suvarılan torpaqların istifadəyə verilməsinin sürətləndirilməsi məqsədilə ilkin mərhələdə Xızı rayonunun 3400 hektar torpaq sahələrində meliorativ tədbirlərin həyata keçirilməsinə başlanılıb. Dövlət Neft Fondundan “Samur-Abşeron suvarma sisteminin yenidən qurulması” layihəsinə ayrılmış vəsait hesabına Xızı rayonunda ümumilikdə 7100 hektar (5415 hektar yeni suvarılan), Siyəzən rayonunda isə 4670 hektar (3963 hektar yeni suvarılan) sahədə meliorativ tədbirlər başa çatdırılacaqdır.

Ehtiyat fondundan ayrılan vəsait hesabına 34 şəhər və rayonun 241 yaşayış məntəqəsinin əkin sahələrinin suvarılması, habelə əhalinin içməli suya olan tələbatının ödənilməsi məqsədilə 300 subartezian quyusu qazılacaqdır”- deyə, o bildirib.

Ölkə.Az