SOCAR Gürcüstanın qazlaşdırılmasına təxminən 21,4 milyon dollar xərcləyib

Şirkət məlumat yaydı.

SOCAR “Georgia Gas” MMC 2014-cü ildə qonşu respublikanın qazlaşdırılması layihələrinə təxminən 21,4 milyon dollar məbləğində sərmayə yatırıb, o cümlədən şirkət vasitəsilə Gürcüstan bazarına 798 milyon kubmetr kommersiya təyinatlı təbii qaz satılıb.

Bu barədə Dövlət Neft Şirkətindən (SOCAR) məlumat verilib.

“Gürcüstanda 1000 kilometrdən artıq yeni qaz xәtlәri çəkilib, nəticədə 47,1 min abonent təbii qazla təmin olunub. Bu ilin sonuna kimi Gürcüstanda təbii qazla təmin olunan abonentlərin sayı 480 minə çatıb. 2014-cü il ərzində Gürcüstan bazarına ümumilikdə 1,348 milyard kubmetr həcmində təbii qaz çatdırılıb ki, bu da 2013-cü illə müqayisədə 10,5% çox olub”- deyə, məlumatda qeyd olunur.

Xatırladaq ki, SOCAR “Georgia Gas” 2007-ci ildə qonşu respublikanın qaz bazarında fəaliyyət göstərmək məqsədi ilə yaradılıb. Şirkət təbii qazın idxalı, sosial və kommersiya tipli istehlakçılara satışı ilə məşğul olmaqla yanaşı, Gürcüstanın İqtisadi İnkişaf Nazirliyi ilə imzalanmış müqaviləyə əsasən yeni qaz kəmərlərinin tikintisi və mövcud kəmərlərin reabilitasiyasını həyata keçirir./Oxu.az/

Ölkə.Az