Ekspert: \"Xeyir işlər gördükdə özünüreklam unudulmalıdır\"

"Bu tip çarxlar TV-də ödənişsiz yayımlanır"

"Son 2 il ərzində bu sahədə müəyyən qədər canlanma var. Amma öncəki illərdə bu tip reklamlara şirkətlər maraq göstərmirdi. Bu tip reklamlara ancaq dövlət qurumları maraq göstərirdi. Hazırda isə marketinqin yeni dövrü - duyğusal yanaşma dövrü başladığı üçün şirkətlər də sosial reklam çarxlarına üz tutublar".

Bu sözləri Ölkə.Az-a danışan marketinq üzrə ekspert Ramil Cabbarov deyib.

"Qanunvericiliyə əsasən, bu tip reklamlarda əgər sifarişçi şirkətin adı və ya loqosu yoxdursa, TV-də ödənişsiz yayımlanır. Amma yerli sahibkarlar bir reklama pul xərclədikləri və xərc qarşılığında adın çəkilməməsini qəbul etmirlər.

Ən əsas prinsip isə "sağ əlin verdiyini sol əl bilməməli" olmalıdır. Yəni, xeyir işlər gördükdə özünüreklam unudulmalıdır.

Türkiyədə "kamu spotu" ilə adlandırılan sosial reklam çarxları isə dünya reytinq sıralamasında ABŞ-dan sonra ikinci yerdədir. Ən çox sosial reklam çarxı çəkən və buna vəsait xərcləyən isə Coca-Cola şirkətidir".

Qeyd edək ki, sosial reklam çarxlarının əsas məqsədi cəmiyyətə faydalı olacaq hər hansı məsələni qabartmaq, pis vərdişlərdən uzaq tutmağa sövq etməkdir.

Fatimə İbrahimova
Ölkə.az