Mərkəzi Bank kreditlərlə bağlı dəyişiklik etdi

Azərbaycan Mərkəzi Bankı (AMB) restrukturizasiya olunmuş aktivlərin təsnifatını dəyişib.

Trend xəbər verir ki, AMB-nin sədri Elman Rüstəmov “Aktivlərin təsnifləşdirilməsi və mümkün zərərlərin ödənilməsi üçün xüsusi ehtiyatların yaradılması Qaydaları”na müvafiq dəyişiklikləri təsdiq edib.

Dəyişikliyə əsasən, 2015-ci il fevralın 23-dək restrukturizasiya olunmuş aktivlər standart aktivlər kimi, 2015-ci il fevralın 23-dən restrukturizasiya olunmuş aktivlər isə qənaətbəxş aktivlər kimi təsnifləşdirilə bilməz.

Restrukturizasiya olunmuş aktiv - iqtisadi və (və ya) hüquqi şəraitin dəyişməsi, habelə borclunun maliyyə çətinliyi yaranması səbəbindən borc öhdəliyinin icrasını təmin etmək məqsədi ilə müqavilə şərtləri dəyişdirilmiş və ya yeni öhdəlik kimi rəsmiləşdirilmiş borc öhdəliyidir.

Dəyişikliklər martın 7-dən qüvvəyə minib. Qeyd edək ki, Azərbaycanda 45 bank fəaliyyət göstərir.

Əslində bu qərar müştəriyə deyil, banklara aiddir. Belə ki, banklar gecikdirilmiş kreditə görə ehtiyat pul yaradır və yeni dəyişiklik də həmin ehtiyat pula aiddir.

Ölkə.az