Nazirlik qurumunun zərəri 2,4 dəfə artıb - 2 milyonu ötdü

Nəqliyyat, Rabitə və Yüksək Texnologiyalar Nazirliyinin tabeliyində İnnovasiyalar Agentliyi 2020-ci ili 2,225 mln manat məcmu zərərlə başa vurub.

“Ölkə.az”ın məlumatına görə, qurumun zərəri 2019-cu ilin yekunu ilə müqayisədə 2,4 dəfə artıb. 2019-cu ilin yekununda İnnovasiyalar Agentliyinin zərəri 948,254 min manat təşkil edib.

Belə ki, 2020-ci il dekabrın 31-nə agentliyin ticarət fəaliyyətindən gəlirləri 64,432 min manat, investisiya gəlirləri 35,222 min manat maliyyə aktivlərinin dəyərsizləşməsi üzrə ehtiyat ayırmalarının bərpasından gəliri 10,891 min manat, əməliyyat xərcləri 65,217 min manat, inzibati xərcləri 2,272 mln manat olub. Qurumun digər gəlirləri 1,750 min manat, məzənnə fərqindən xərci 479 manat olub.

Agentliyin cəmi aktivləri illik müqayisədə 2,6% artaraq 2020-ci ilin yekununda 29,676 mln manat, cəmi öhdəlikləri 4,1% artaraq 760,368 min manat olub. 

Nizamnamə kapitalı ötən il ərzində 454 min manat artırılaraq 954 min manata çatdırılan İnnovasiyalar Agentliyinə dövlət büdcəsindən 2,933 mln manat ayrılıb. Bölüşdürülməmiş mənfəəti 27,708 mln manatdan 25,028 mln manata düşən qurumun cəmi kapitalı ötən ilin sonunda 29,676 mln manat təşkil edir.

Könül 

Ölkə.az