FAO Azərbaycanda toxum sektorunun inkişafına dəstək verir

BMT-nin Ərzaq və Kənd Təsərrüfatı Təşkilatı (FAO) “Azərbaycanda toxum sektorunun inkişafına dəstək” layihəsinə start verib.

Bu barədə Ölkə.Az-a Kənd Təsərrüfatı Nazirliyindən (KTN) məlumat verilib.

Nazirliyin məlumatına görə, layihənin başlanması ilə əlaqədar mayın 22-də, cümə günü Bakıda seminar təşkil edilib.

Seminarda FAO-nun Azərbaycan üzrə nümayəndəsi Mustafa İmir, nümayəndəliyin əməkdaşı Təranə Bəşirova, FAO-nun Mərkəzi Asiya üzrə Subregional Ofisinin baş texniki eksperti Hafiz Mumincanov, Kənd Təsərrüfatı Nazirliyinin bitkiçilik şöbəsinin müdiri İmran Cümşüdov iştirak edib.

Bundan başqa, layihənin Milli Koordinatoru, Kənd Təsərrüfatı Nazirliyi yanında Bitki Sortlarının Qeydiyyatı və Toxum Nəzarəti üzrə Dövlət Xidmətinin rəisi Möhtəsim Əhmədov, KT Nazirliyinin digər aidiyyəti şöbələrin təmsilçiləri, qeyri dövlət təşkilatlarının və toxumçuluq təsərrüfatlarının nümayəndələri olmaqla cəmi 38 nəfər də seminara qatılıb.

FAO-nun Azərbaycan üzrə nümayəndəsi Mustafa İmir açılış nitqi ilə çıxış edərək, layihəyənin həyata keçirilməsinə uğur arzulayıb.
Təqdimatlardan sonra keçirilən müzakirələrdə sektorun üzləşdiyi problemlər, imkanlar, qarşıda duran vəzifələr, kadr hazırlığı,toxum keyfiyyətinə nəzarət və digər məsələlərə dair geniş fikir mübadiləsi aparılıb.

Seminarın yekununda layihənin həyata keçirilməsi üçün ətraflı iş planı hazırlanıb.

Ölkə.Az