“Azersun Holding”in bankının qazancı kəskin azalıb
“Azərbaycan Sənaye Bankı” ASC-nin 2021-ci il sentyabrın 30-na maliyyə vəziyyəti məlum olub.
“Ölkə.az”ın məlumatına görə, sözügedən dövrə bankın cəmi aktivləri 866,646 mln manat təşkil edib. Bu isə ötən ilin eyni dövrü ilə müqayisədə 68,507 mln manat və ya 7,3% azdır.
Müştərilərə verilən kreditlərin həcmi isə illik müqayisədə 118,433 mln manat və ya 34% azalaraq 226,744 mln manata enib. Cari ilin sentyabrın 30-na depozit portfelinin həcmi 592,187 mln manat olub ki, bu da 2020-ci ilin eyni dövrü ilə müqayisədə 10,6% azalma deməkdir.
Bankın cəmi öhdəlikləri 760,239 mln manat, Mərkəzi Bank qarşısında öhdəlikləri isə 137,87 min manat təşkil edib.
“ASB Bank”ın cəmi kapitalı isə illik müqayisədə 2,4% artaraq 106,407 mln manata çatıb.
Cari ilin yanvar-sentyabr ayları üzrə bankın xalis faiz gəlirləri 6,362 mln manat, xalis qeyri-faiz xərcləri isə 7,042 mln manat təşkil edib. Əməliyyat mənfəəti 2,642 mln manat olan bank aktivlər üzrə mümkün zərərlərin ödənilməsi üçün xüsusi ehtiyatın yaradılmasına 486 min manat ayırıb. Mənfəətindən 438,86 min manat vergi ödəyən bank 2021-ci ilin ilk 9 ayını 1,717 mln manat xalis mənfəətlə başa vurub.
Qeyd edək ki, 2020-ci ilin sentyabr göstəriciləri ilə müqayisədə “ASB Bank”ın xalis mənfəətində 3 dəfə azalma müşahidə olunub.
Xatırladaq ki, bankın səhmlərinin 98,4252%-i “Anadolu Investment Company” MMC-yə, 1%-i Leyla Goozal Kurta, 0,5748%-i isə "Azərbaycan Sənaye Lizinq" MMC-yə məxsusdur.
Könül
Ölkə.az
