“Turanbank”ın Mərkəzi Banka borcu artıb
“Turanbank” ASC 2021-ci ilin üçüncü rübü üzrə maliyyə hesabatını açıqlayıb.
“Ölkə.Az”ın məlumatına görə, cari ilin sentyabrın 30-na bankın cəmi aktivləri 671,282 mln manat təşkil edib. Bu isə ötən ilin eyni dövrü ilə müqayisədə 21,7% çoxdur.
Müştərilərə verilmiş xalis kreditlərin həcmi illik müqayisədə 17,9% artaraq 403,115 mln manat təşkil edib.
Ötən ilin eyni dövrü ilə müqayisədə bankın depozit portfeli 31,8% artaraq 361,854 mln manata çatıb. Bankın cəmi öhdəlikləri isə 23% artaraq cari ilin sentyabrın 30-a 584,725 mln manat təşkil edib.
Sözügedən dövrə bankın Mərkəzi Bank və dövlət fondları qarşısında öhdəlikləri 103,662 mln manat olub ki, bu da illik müqayisədə 11,830 mln manat və ya 12,9% çoxdur.
“Turanbank”ın cəmi kapitalı isə illik müqayisədə 13,6% artaraq 86,557 mln manata enib.
Cari ilin ilk doqquz ayında bankın xalis faiz gəlirləri 10,482 mln manat, xalis qeyri-faiz xərcləri isə 9,452 mln manat təşkil edib. Əməliyyat mənfəəti 1,030 mln manat olan bank aktivlər üzrə mümkün zərərlərin ödənilməsi üçün xüsusi ehtiyatların yaradılmasına 627 min manat ayırıb. Mənfəətindən vergi ödəməyən bank 2021-ci ilin ilk doqquz ayını 404 min manat xalis mənfəətlə başa vurub.
Bankın 404 min manatlıq xalis mənfəəti 1,360 mln manatlıq yığılmış zərərinə əlavə olunub və nəticədə, yığılmış zərər 956 min manata enib.
Xatırladaq ki, “Turanbank”ın səhmlərinin 55,3%-i 20 fiziki şəxsə, 44,7%-i isə 8 hüquqi şəxsə məxsusdur.
Könül
Ölkə.az
