Rəsmi qəzet dövlət xidmətini tənqid etdi

"Azərbaycan" qəzetində İqtisadiyyat Nazirliyi yanında Antiinhisar və İstehlak bazarlarına Nəzarət Dövlət Xidmətinin fəaliyyəti tənqid olunub.

"Ölkə.Az" xəbər verir ki, qiymət artımları ilə bağlı dərc olunan yazıda xidmətin yalnız araşdırma etdiyi və ciddi addımlar atmadığı qeyd olunub. Qurumun qiymət artımı ilə bağlı açıqlaması da tənqid olunub:

"Mücərrəd terminli uzun cümlələrdən aydınlaşan yeganə qənaət odur ki xidmət hələ ki araşdırmalar aparır. Yəni fəaliyyəti ancaq bununla məhdudlaşır".

Xidmətin qiymət artımlarının səbəbləri ilə bağlı açıqlaması isə belə olub: 

"Malların (işlərin, xidmətlərin) qiymətləri liberal bazar iqtisadiyyatı şəraitində rəqabət prinsiplərinə uyğun olaraq, tələb-təklif əsasında formalaşır. Texnoloji xüsusiyətlərdən asılı olaraq raqabətin mümkün olmadığı və sosial əhəmiyyət kəsb edən bir sıra malların (işlərin, xidmətlərin) qiymətləri isə dövlət tərəfindən tənzimlənir. Dövlət tərəfindən tənzimlənməyən malların (işlərin, xidmətlərin) qiymətlərinin dəyişməsi zamanı rəqabət mühitinin pozulması hallanının aşkar edilməsi və qarşısının alınması məqsədilə Antiinhisar ve İstehlak Bazarına Nəzarət Dövlət Xidməti tərəfindən bazarda müxtəlif məhsulların qiymətinin mütəmadi monitorinqi aparılır və bazar araşdırmaları həyata keçirilir. Daxili bazarda aparılan təhlillər və müşahidələrə əsasən, bir sıra mehsulların qiymət artımının səbəbləri kimi idxal olunan məhsulların idxal bazarında qiymətinin artması, idxal xammal əsasında istehsal olunan bir sıra məhsulların xammallarının dünya bazarında bahalaşması, məhsulun maya dəyərini formalaşdıran bir sıra xərclərin (daşınma, enerji, xammal və s.) artması, esas idxal bazarları olan bir sıra ölkələrin öz daxili bazarında qiymət sabitliyini təmin etmək, eyni zamanda ərzaq ehtiyatlarını yaratmaq istiqamətində reallaşdırdıqları intervensiyalardır".

K.V