Bakıda bu sahədə qiymət 10 dəfəyə yaxın artdı - AÇIQLAMA

“Formula 1” yarışları ilə bağlı Bakı şəhərinin mərkəzində yerləşən hotellərdə və kirayə mənzil fondunda canlanma və qiymət artımı müşahidə olunur. 

Bunu “Ölkə.Az”a açıqlamasında Azərbaycan Hotellər və Restoranlar Assosiasiyasının İdarə Heyətinin sədri Samir Dübəndi deyib. O bildirib ki, qiymət artımı Bakı Şəhər Halqası üzərində yerləşən hotel və mənzillərdə qeydə alınıb:

“Bu gün qiymət təklifi adətən cari mövsümdə mövcud olan qiymətlərdən 10 dəfəyə qədər çoxdur. Məsələn, İçəri Şəhər ərazisində yerləşən hotellərdə tək və 2 nəfərlik otaqlar 7-10 dəfə baha qiymətə təklif olunur. Bu da onu göstərir ki, sözügedən otellərdə yer artıq yoxdur, məhdud sayda otaqlar isə yüksək qiymətlə satışa çıxarılır. Cari mövsümdə sözügedən hotel nömrələrinin qiyməti 200 manata yaxın olsa da, hazırda qiymət 2000 manata qədərdir”. 

S. Dübəndinin sözlərinə görə, “Formula 1” kimi tədbirlərə daha çox varlı turistlər üz tutur. Bu baxımdan daha çox satış beşulduzlu və şəbəkə hotellərində olur. Bu yarışın kiçik və orta hotelçiliyə təsiri daha azdır. Bunlar isə əsasən şəhər mərkəzində və halqa üzərində olan yollardır. 

“Dünya təcrübəsinə nəzər saldıqda, belə tədbirlər zamanı qiymət artımlarını müşahidə etmək mümkündür. Bu kimi tədbirlərdə turizm canlanır, həm hotellər, həm də kirayə mənzil təklif edən şəxslər də fayda götürür”, - deyə Azərbaycan Hotellər və Restoranlar Assosiasiyasının sədri əlavə edib.

Könül
Ölkə.Az